Qyzylorda oblysynda tórt joba arqyly 465 mln. teńge ınvestıtsııa tartylady

QYZYLORDA. QazAqparat - Bıylǵy jyly Shıeli aýdanynyń aımaqtyq úılestirý keńesine usynylǵan jobalyq quny 465 mln teńgeni quraıtyn 4 joba qoldaý taýyp, júzege asyrylatyn bolady. Bul týraly QazAqparat HAA tilshisi  aýdandyq ákimdikke silteme jasap habarlady.

Ótken jyly da Shıeli aýdanynda ındýstrııalyq-ınnovatsııalyq damý baǵdarlamasy arqyly aýqymdy ister qolǵa alynǵan bolatyn.  Máselen, «DANAKE» Korporatsııasy» JShS joba­lyq quny 64 mlrd teńgelik tsement shyǵarý zaýytynyń qurylysy irgetasy ótken jyldyń sońynda qalandy. Tamponajdy tsement óndiretin zaýyt jylyna 1 mln tonn ónim óndiretin bolady. Zaýyttyń qurylys kezeńinde 1200 adam jumys istese, zaýyt tolyq iske qosylǵan kezde 260 adamǵa jańa turaqty jumys orny ashylady.

Ústimizdegi qolǵa alynatyn jobalar arasynda «Shıeli MTS» JShS-nyń (dırektory B.Tasbolatov) kúrish aqtaý zaýyty qurylysy jobasy bar. Onyń jalpy quny - 250 mln teńge. Júzege asyrý merzimi 2016-2018 jyldar. Qurylys kezinde - 30, iske qosylǵanda 40 jumys orny ashylady. Zaýyttyń qýattylyǵy táýligine 60 tonna kúrish óńdeý. Jyldyq qýattylyǵy 7 myń tonna aq kúrish, aqusaq - 1850 tonna, kebek untaǵy 1400 tonna shyǵarý. Búgingi kúni 5 ga jer telimin alý jumystary júrgizilýde.

Sonymen qatar «Shıeli-Jolshy» (Á. Abdýllaev) JShS-nyń «Temir beton buıymdaryn shyǵarý jáne paıdalaný zaýytynyń qurylysy» jobasy júzege asyrylady. Joba quny - 124 mln teńge, jańa jumys oryndarymen qurylys kezinde - 10 adam, iske qosylý kezinde 15 adam qamtylatyn bolady. Qýattylyǵy jylyna 2500 dana plıta shyǵarý. Búgingi kúni 5 ga jer telimin alý jumystary júrgizilýde.

Jobalar sanatyna «Bek-trans stroı» (B. Adyrbekov) JShS-nyń «Qurylys materıaldaryn (shlakoblok, ák tas, polıpropılendi qapshyq) óndirý» jobasy da kiredi. Joba quny - 55 mln. teńge. Júzege asyrý merzimi 2016-2018 jyldar. Qurylys kezinde   30, iske qosylǵanda 26 jumys orny ashylady. Jyldyq qýattylyǵy   ák tas - 12 myń tonna, polıpropılendi qapshyq - 1 mln dana, shlakoblok - 180 myń dana dep josparlanyp otyr.

Sondaı-aq «B.Syzdyqov» «Kólik jáne aýyl sharýa­shylyǵyna arnalǵan jabdyqtardy jón­deý men elektr quraldaryn jınaqtap óńdeý óndirisi» jobasy. Jobanyń jalpy quny - 36 mln teńge. Júzege asyrý merzimi 2016-2018 jyldar. Qurylys kezinde - 15, iske qosylǵanda 7 jumys orny ashylady. Qýattylyǵy aıyna jasalatyn jóndeý jumystar sany - 156, kórsetiletin tehnıkalyq qyzmet kórsetý sany - 182. Búgingi kúni 5 ga jer telimin alý jumystary júrgizilýde. Tórge ozǵan tórt joba da óńirdiń ekonomıkasyna jańa serpin beredi.