Qyzylorda oblysynda tórt aýylda ákim saılaýy ótip jatyr
Saıası mańyzdy shara QR «Saılaý týraly konstıtýtsııalyq» Zańyna sáıkes ótkizilip jatyr. Saǵat 7.00-den bastap Aral aýdanynyń Jetes bı, Qazaly aýdanynyń Kólaryq, Qyzylqum, Birlik aýyldarynda ornalasqan №16, 74, 78, 79, 80 saılaý ýchaskeleri ashyldy.
Atalǵan sharaǵa erte kelgen araldyq qarııa Ermek Aqmyrzaev:
«Osy aýyldyń turǵyny ǵana emes, janashyr aqsaqaly retinde aýyl ákimderiniń saılaýyna erekshe mán beremiz. Prezıdent bastamasymen aýyl ákimderin tikeleı saılaýǵa múmkindik týdy. Durys boldy. Іsker, belsendi azamattyń aýyl ákimi bolǵanyn qalaımyz. Sol úshin de tań sáriden erte turyp daýys berýge asyqtym», - deıdi.
Aral aýdany Jetes bı aýyldyq okrýginde 341 saılaýshy tirkelse, Kólaryq aýylynda 902, Qyzylqum okrýginde 737, Birlik aýylynda 395 saılaýshy bar.
Aýyl ákimi bolýǵa nıetti barlyǵy 12 kandıdat saılaýǵa tústi. Árbir okrýgte 3 azamat kandıdat retinde baq synap jatyr.
Saıası naýqanǵa qatysyp, alǵash ret daýys berý quqyǵyna ıe bolǵan Birlik aýylynyń jas saılaýshysy Damır Shyntemir áserimen bólisti.
«Búgin men úshin mańyzdy kún, tuńǵysh ret daýys berýge keldim. El bolashaǵy úshin aýyldyń keleshegin oılaıtyn azamatqa óz daýysymdy berdim. Menińshe, saılanatyn jańa ákim aýylymyzdy kórkeıtýge bar kúshin-jigerin jumsap, naǵyz ózekti máselelerdi sheshýge yqpal etedi dep oılaımyn», - dedi ol.
Eske salaıyq, jyl basynan beri Qyzylorda óńirinde 17 aýyldyń ákimi saılandy. Al, jyl sońyna deıin aımaqta taǵy 12 aýyl ákiminiń saılaýy ótkiziledi.