Qyzylorda oblysynda «Til saqshysy» reıdteri úzdiksiz júrgizilip keledi

QYZYLORDA. QazAqparat - Qyzylordada halyqaralyq «Qazaq tili» qoǵamy» qoǵamdyq birlestigi oblystyq fılıalynyń esep berý konferentsııasy ótti, dep habarlaıdy QazAqparat tilshisi.

Oblys ortalyǵyndaǵy Dostyq úıinde halyqaralyq «Qazaq tili» qoǵamy» qoǵamdyq birlestigi oblystyq fılıalynyń esep berý-saılaý konferentsııasy ótti. Bul shara oblys ákimdigi tarapynan uıymdastyryldy. Konferentsııaǵa oblys ákiminiń orynbasary Serik Ahmet arnaıy qatysty.

Konferentsııa otyrysynda óńirdegi memlekettik tildiń mártebesin arttyrý baǵytynda atalǵan qoǵamnyń atqarǵan jumystary tarazylandy. Aldaǵy mindetter naqtylanyp, oblystyq fılıaldyń basqarma, alqa músheleri jáne tóraǵasy, tekserý komıssııasynyń quramy saılandy. Sondaı-aq, qoǵamnyń kezekti VI quryltaıyna delegattar saılandy.

Memleket basshysynyń tapsyrmasyna oraı halyqaralyq «Qazaq tili» qoǵamy» qoǵamdyq uıymynyń kezekti quryltaıy 26 qarashada Túrkistan qalasynda ótedi. Osyǵan sáıkes uıymnyń qalalyq, aýdandyq fılıaldarynda, bastaýysh uıymdarda jıyndar boldy.

Konferentsııada oblystyq fılıaldyń tóraǵasy Sádýaqas Ańsat esepti baıandama jasady. Búginde atalǵan qoǵam 7 aýdan men 2 qalalyq fılıaldaǵy 796 bastaýysh uıymdaǵy 38973 adamdy múshe etip biriktirip otyr. 2012 jyldan beri qoǵamdyq uıymnyń jumysy jolǵa qoıylǵan. Jylyna 2 retten májilisin ótkiziledi. Onda basqarma men alqa atqarylǵan isterdi saraptap, jumys josparyn belgileıdi, tóraǵalardyń esebin tyńdaıdy. Osy ýaqytta 3 respýblıkalyq konferentsııa ótti, ár aýdanda 2 jylda 1 ret oblystyq semınar-keńes ótýde.

Qyzylorda qalasynda jáne aýdan ortalyqtarynda «Til saqshysy» reıdi úzdiksiz júredi. Túrli menshiktegi mekeme, qyzmet kórsetý oryndaryndaǵy mańdaıshadaǵy jazýdan bastap syrtqy jarnamadaǵy zańbuzýshylyq pen qatelikterdi anyqtap, eskertý jasalýda.

Oblystyq fılıal basylymy - respýblıkalyq «Til saqshysy» gazeti 2013 jyldan bastap shyǵýda. Búginde gazet taralymy 12000 danadan asty. Ondaǵy tańdaýly maqalalar «Til saqshysy» - Namys qamshysy» jınaǵyna toptasyp, jylyna eki kitap shyǵarylady. Sondaı-aq «M.Áýezov shyǵarmalary - qazaqtyń qoǵamdyq ómiriniń entsıklopedııasy» konferentsııasy, «Qyzylorda oblystyq, «Qazaq tili» qoǵamynyń 2011-2013 jyldary ótkizgen is-sharasy», «Memlekettik tildiń qazirgi jaıy jáne onyń qoldanys aıasyn arttyrýdaǵy mindetteri», «Jýrnalıst ádebi» paraqshalary shyǵaryldy.

«Qazaq tili» qoǵamynyń oblystyq fılıalynyń tóraǵasy bolyp Sádýaqas Ańsat qaıta saılandy.

Eske salsaq, budan buryn Qyzylorda oblysynyń onomastıka salasyndaǵy jumystary úzdikter qatarynda baǵalandy.