Qyzylorda oblysynda tastan jasalǵan qobyz tabyldy

ASTANA. QazAqparat - Syr óńirindegi Qorqyt kesenesi mańynan tastan jasalǵan qobyz tabyldy. Arheologtardyń boljamy boıynsha, bul jádiger oǵyz dáýirine jatady, dep habarlaıdy QazAqparat «Habar 24» arnasyna  silteme jasap.

Qundy artefakt arheologııalyq qazba jumystary barysynda ІH-H ǵasyrlarda port retinde tirshiligi qyzǵan shahar - Sortóbe qalasy aýmaǵynan tabyldy. Qazir ejelgi mekenniń 60% bóligin sý shaıyp ketken. Qundy jádigerdi arheologtar Sortóbe qalashyǵynyń úshinshi qabatyn qazý kezinde taýyp otyr. Qobyzdyń kólemi 40 santımetr shamasynda. Mýzykalyq aspaptyń músini qumshaýyt tastan qashalyp, monshaqtarmen árlengen. Ǵalymdar osy rette eger kóne qalashyq tolyq arshylsa, Qorqyt babaǵa qatysty jańa derekter shyǵýy múmkin ekendigin aıtady. Syrdarııanyń negizgi arnasy qalany salǵan kezde Sortóbeden alystaý bolǵan. Al qazir, sý shaıǵan shahardyń bir buryshy ǵana qalǵan.

«Sondyqtan tarıhtan syr shertken mekendi zerttep-zerdeleý jáne tabylǵan jádigerlerin murajaıǵa tapsyrý jumystaryn júıeleý qajet», - deıdi ǵalymdar.   

«Qobyz beınesindegi tastan jasalǵan qobyzdyń sulbasy. Ózim sýretshi retinde munyń qobyz ekenin bildim. Árkim ártúrli joramal jasaı beredi. Biraq qaǵaz betine birkelki túsirgen kezde aıqyn kórinedi. Tabıǵı dep aıtaıyn desek, tabıǵıǵa kelmeıdi. Arty jońylǵan. Kelesi jaǵy tep-tegis, jyltyr etip óńdelgen», - deıdi ónertanýshy Aǵabek Nazarov.

«Bul jer qystaq bolýy múmkin. Sebebi halyq osynda, darııanyń jaǵasyna malǵa jaıly, shóbi shúıgin bolǵandyqtan turaqtaǵan. Negizi eskertkishtiń 4 mádenı qabaty bar. Oǵyz mádenıeti Jetiasar mádenıetimen baılanysty. Jalpy mundaı mádenı eskertkish Ortalyq Azııada joq», - dep atap ótti Memlekettik shyǵys mýzeıiniń aǵa ǵylymı qyzmetkeri (Máskeý) Sergeı Bolelov.