Qyzylorda oblysynda sý tasqynynyń aldyn alý sharalary júrgizilýde

QYZYLORDA. QazAqparat - Jaýyn-shashyn mol túsip, qardyń kúrt erýinen Túrkistan oblysynyń Kentaý, Túrkistan qalalary men Báıdibek, Ordabasy, Saýran aýdandarynyń birqatar aýylynda aýlalar men kóshelerin sý basty. Qyzyloda oblysy ákimdiginen málim etkendeı, osy jaǵdaıǵa baılanysty Syr jurtshylyǵy da alańdaýly.

Joǵaryda qalyptasqan tasqyn sýdyń áserinen Arys ózeninen Syrdarııa ózenine túsetin sý kóleminiń ulǵaıatyndyǵy belgili. Boljam boıynsha bıylǵy 3-4 aqpanda Arys ózeninen Syrdarııa ózenine 100-150 m³/sek túsýi múmkin. Qazir Aral aýdanynan bastap Shıeli aýdanyna deıin ózen betinde tolyq muz qatqan. Muzdyń qalyńdyǵy 18-den 52 sm-ge deıin. Búgingi aqparatqa sáıkes oblys aýmaǵyna sekýndyna 652 tekshe metr sý túsýde.

Qyzylorda qalasy men barlyq aýdan ákimdikterine jáne jaýapty mekemelerge tótenshe jaǵdaıdyń aldyn alýǵa tıisti tapsyrmalar berildi. Jaǵdaı turaqty baqylaýda. Sý tasqynynyń aldyn alý maqsatynda oblys ákimi Nurlybek Nálibaevtiń tapsyrmasyna sáıkes arnaıy shtab qurylyp, 2 aı kóleminde jumys jasaýda. Sý tasqynyna qarsy materıaldyq-tehnıkalyq qorlar boıynsha 141,9 tonna janar-jaǵarmaı jáne basqa da qajetti qural-jabdyqtarmen tolyq qamtylǵan.

Oblys aýmaǵynda Syrdarııa ózeniniń boıynda ornalasqan strategııalyq mańyzy bar Qyzylorda, Aıtek, Qazaly jáne Aqlaq sý toraptary paıdalaný Erejesine sáıkes tranzıttik rejımge kóshirildi.

Oblysta 29 sý basý aımaqtary anyqtalyp, oǵan 366 arnaıy tehnıka birligi jáne 1137 adamy bar 138 jaýapty mekeme bekitildi. Sý tasqynyna qarsy is-sharalardy júrgizý úshin azamattyq qorǵaý qyzmetteriniń kúshteri men quraldary daıyndyqqa keltirildi.

Sý tasqyny kezeńinde halyqty evakýatsııalaý úshin 64 jınaqtaý jáne 78 qabyldaý pýnktteri daıyndalǵan.

Oblystyń barlyq aýmaǵynda ózen boıynda táýlik boıy kezekshilik uıymdastyrylýda.

Syrdarııa ózenindegi sý deńgeıin tómendetý maqsatynda magıstraldyq kanaldar men kólder júıeleri arqyly sý alý sharalary turaqty júrgizilýde.