Qyzylorda oblysynda «Pfizer» vaktsınasyn 19,2 myń adam saldyrdy

QYZYLORDA. QazAqparat - Qyzylorda oblysynda 19 myńnan astam adam koronavırýsqa qarsy «Pfizer» vaktsınasyn saldyrdy, dep habarlaıdy QazAqparat tilshisi.

Qazirge deıin barlyǵy 19247 adam «Pfizer» vaktsınasynyń birinshi komponentin saldyrdy. Ekinshi komponentimen qamtylǵandar sany - 11050 adam.

«Búginge deıin atalǵan vaktsına saldyrǵandar arasynda 12-17 jas aralyǵyndaǵy jasóspirimder sany basym. Olardyń 15746-sy birinshi komponentin alsa, 8806-y ekinshisin aldy. Al júkti áıelder arasynda birinshi komponentpen – 1517, ekinshi komponentpen – 1014, laktatsııa kezeńindegi áıelder arasynda birinshi komponentpen – 1984, ekinshi komponentpen 1230 adam qamtyldy», - dep málim etti Qyzylorda oblystyq Sanıtarııalyq-epıdemıologııalyq baqylaý departamentiniń baspasóz hatshysy Aıman Janahaeva.

Eske salsaq, Qyzylordada tumaýǵa shaldyqqandar arasynda balalardyń úlesi basym bolyp tur.