Qyzylorda oblysynda on aıdyń ishinde 169 esirtki qylmysy anyqtaldy
Bıylǵy jyldyń on aıynda óńirde 169 esirtki qylmysy anyqtaldy. Onyń ishinde, esirtkini asa iri mólsherde saqtaýdyń -10, esirtki satýdyń - 22, esirtki ósirýdiń - 41 deregi tirkeldi. Sondaı-aq, zańsyz aınalymnan barlyǵy 143 keli esirtki zaty tárkilense, onyń 352 gramy - sıntetıkalyq esirtki quraly.
«Jyl basynan beri esirtkimen baılanysty qylmystyq teris qylyqtardyń 90 deregi anyqtaldy. Osyǵan oraı esirtki qylmysyn anyqtaý boıynsha tıisti jumystar júrgizilgen bolatyn. Atqarylǵan is-sharalardyń nátıjesinde, oblys kóleminde esirtkini nasıhattaý jáne jarnamalardyń 2 deregi tirkelip, olar der kezinde joıyldy. Áleýmettik jeli arqyly sıntetıkalyq esirtkini taratý derekterin anyqtaý maqsatynda departamenttiń qyzmetkerleri qala kóleminde reıdtik is-sharalar júrgizdi. Tıisinshe, oblys ortalyǵynda sıntetıkalyq esirtki jasyrylǵan 75 núkte tabyldy. Olar boıynsha 3 qylmystyq teris qylyq anyqtalyp, 72 derek boıynsha saraptama taǵaıyndaldy», - dedi oblystyq polıtsııa departamentiniń Esirtki qylmysyna qarsy is-qımyl basqarmasynyń bastyǵy Erkin Tuńǵyshbaı.
Vedomstvo málimetinshe, respýblıka kóleminde 1 maýsym - 30 qazan aralyǵynda ótkizilgen «Qarasora-2021» jedel profılaktıkalyq is-sharasy kezinde esirtki ósirýdiń 41 deregi tirkeldi. Atap aıtqanda, 16 derek dalalyq aımaqtan, 25 deregi úı aýlasynan jáne saıajaıdan tabyldy. Esirtki ósirgeni úshin barlyǵy 52 azamat ustaldy. Oqıǵa ornynan barlyǵy 14 myń túpten asatyn sora ósimdigi joıyldy.
Aıta ketetin jáıt, tamyz aıynyń bastap qumdy dalalyq aımaqtarǵa 21 ret áýeden sholý jumystary júrgizilgen. Birlesken is-sharanyń barysynda esirtki alqabynyń 8 deregi anyqtalyp, esirtkini asa iri mólsherde saqtaýdyń 4 deregi anyqtaldy.