Qyzylorda oblysynda munaı jáne gaz salasy qyzmetkerleri marapattaldy
Munaı jáne gaz qyzmetkerleriniń kásibı merekesi aıasynda oblys ákimi Gúlshara Ábdiqalyqova sala mamandarymen kezdesip, tól mereke ıelerine qurmet kórsetti.
Jıynǵa munaı kompanııalarynyń ókilderi men sala ardagerleri shaqyryldy.
Aımaq basshysy óńirdiń munaı-gaz salasy aımaq ekonomıkasyn damytýda úlken ról atqaratynyn erekshe atap ótti. Sala mamandaryn kásibı merekesimen quttyqtady.
«Qazirgi tańda respýblıkalyq bıýdjet esebinen úsh shógindi basseınderin geologııalyq zerdeleý jumysy júrip jatyr. Osy rette óńirdiń munaı óndirýshi jáne barlaýshy kompanııalary da atsalysýy qajet», - dedi Gúlshara Ábdiqalyqova.
Qazirgi tańda «Keńqııaq-Atyraý» munaı qubyrynyń reversin keńeıtý jobasy aıaqtalý ústinde.
Joba tolyǵymen iske asqanda oblystaǵy munaı óndirýshi kompanııalary úshin ishki naryqqa munaı jetkizý júktemesin tómendetýge múmkindik beredi.
Jıyn barysynda aımaq basshysy qara altyndy ıgergen munaıshylar qaýymyn marapattap, el ıgiligi jolyndaǵy eńbekterine tolaǵaı tabys tiledi.
Óz salasynyń úzdigi atanǵan atalǵan salanyń 6 mamanyna oblys ákiminiń «Qurmet gramotasy» tabystaldy.
Olardyń qatarynda «Qumkól Trans Servıs» JShS Basqarýshy dırektory Baıqadam Ablasanov, «PetroQazaqstan Qumkól Resorsız» AQ jobalaý bóliminiń basshysy Qurmanǵazy Asanov, «Kazpetrolgroup» JShS munaı jáne gaz óndirý masteri Dáýlet Eshmuratov, «SNPS-Aıdan Munaı» AQ burǵylaý jumystary boıynsha sýpervaızeri Samet Qalybaev, «QOR» Munaı kompanııasy» AQ satý bóliminiń mamany Serik Tólegenov pen «KMNPZ» JShS mashınısti Murat Kóshkinbaev bar.
Aıta keteıik, Qyzylordada geologııalyq barlaý jumysy júrgizilip jatyr.