Qyzylorda oblysynda mektep kompıýterimen porno saıtty izdeý júzege asyrylǵan
Jalaǵash aýdanynyń prokýratýrasy bilim berý salasyndaǵy zańdylyqtyń saqtalýyna taldaý júrgizgen bolatyn. Taldaý nátıjesinde aýdan mektepterinde bilim alýshylardyń densaýlyǵy men damýyna zııan keltiretin aqparatqa erkin qol jetimdilik bar ekendigi anyqtaldy.
«Olardyń birinde, 9:45 shamasynda veb-braýzer kómegimen porno saıtty izdeý júzege asyrylǵan. Al aýdannyń basqa mektepterinde de zańnamamen tyıym salynǵan aqparatqa (porno saıttar, qumar oıyndarǵa arnalǵan saıttar jáne t.b.) erkin qol jetimdilik bar ekeni belgili boldy. Osyǵan qaramastan, jalpy bilim berý mektepteriniń basshylyǵy «Bilim týraly» Zańnyń 43-baby 3-tarmaǵynyń 11-3) tarmaqshasynyń talabyn saqtamaı, balalardyń densaýlyǵy men damýyna zııan keltiretin aqparatqa qol jetkizýin shekteýge arnalǵan baılanys operatorlarynyń qyzmetterin qosýdy qamtamasyz etpegen. Óz kezeginde «Qazaqtelekom» AQ baılanys operatory túrli tarıfter sheńberinde tyıym salynǵan saıttarǵa kirýdi shekteý (buǵattaý) qyzmetterin kórsetýde. Aýdan prokýratýrasynyń usynýy boıynsha aýdannyń barlyq 20 mektebiniń basshylyǵy Ákimshilik quqyq buzýshylyq týraly kodekstiń 409-babynyń 7-2-bóligi boıynsha ákimshilik jaýapkershilikke tartylyp, 345000 teńge kóleminde aıyppul salyndy» dep málim etti Qyzylorda oblystyq prokýratýrasynan.
Sondaı-aq, aýdannyń 8 mektebi baılanys operatorymen jańa sharttar jasasny. Al 12 mektep úshin bıýdjetten 7,5 mln teńge bólindi. Atalǵan buzýshylyqtar oqý jyly bastalǵanǵa deıin joıylmaq.
Eske salsaq, budan buryn Qyzylordada kólik júrgizý quqyǵynan aıyrylǵan júrgizýshi qylmystyq jaýapkershilikke tartyldy.