Qyzylorda oblysynda maýsym aıynda 21 adam qarbyzdan ýlanǵan
Jazdyń alǵashqy kúnderinen bastap turǵyndar arasynda merziminen erte pisken baqsha ónimderi men jemis-jıdekten ýlanǵan naýqastar sany ósip keledi.
«Maýsym aıynda oblystyq juqpaly aýrýlar aýrýhanasynda merziminen erte pisken baqsha ónimderinen (qarbyz) paıda bolǵan jiti ishek ınfektsııasyna shaldyqqan 21 jaǵdaı esepke alyndy. Qarbyz jazdyń alǵashqy aıynda saýda sórelerinde paıda bola bastaıdy. Bul ýaqytta ónimder anaǵurlym qaýipti, ıaǵnı nıtratpen ýlaný deńgeıi joǵary», - dep málim etti Qyzylorda oblysy sanıtarlyq-epıdemıologııalyq baqylaý departamentinen.
Vedomstvo málimetinshe, jyl saıyn oblys turǵyndary arasynda juqpaly jiti ishek aýrýlaryna shaldyǵý respýblıkalyq ortasha kórsetkishten 2-3 ese joǵary bolyp otyr.
Bıylǵy 5 aıda oblys kóleminde jiti ishek ınfektsııasynyń 371 jaǵdaıy tirkelgen.
Aýrý kórsetkishi - 100 myń halyqqa shaqqanda 44,8.
Eske salsaq, buǵan deıin Qyzylorda oblysynda qyshyma aýrýy ásirese 14 jasqa deıingi balalar arasynda kóp kezdesetini habarlanǵan bolatyn.