Qyzylorda oblysynda kópir men jolaıryq salynyp jatyr

NUR-SULTAN. QazAqparat - Syrdarııa ózeniniń sol jaǵalaýyndaǵy basty qalalyq joldyń «Batys Eýropa –Batys Qytaı» trassasymen túıisken jerinde kólik jolaıryǵy salynýda.

QR Indýstrııa jáne ınfraqurylymdyq damý mınıstrligi baspasóz qyzmetiniń habarlaýynsha, búginde 230 qada burǵylanyp, betondaldy. Jolaıryǵynyń qurylysy shamamen 15 myń adamdy jumyspen qamtýǵa múmkindik beredi dep kútilýde.

Sonymen qatar Qyzylorda oblysyndaǵy Karlan ýchaskesinde kópir qurylysy júrip jatyr. Qazirgi ýaqytta 20 qada burǵylanyp, betondalǵan. Sonymen qatar, rostverk qurylysy júrgizilip, kópirdiń kireberis joldaryna topyraq tóseý jumystary qyzý júrip jatyr. Ári qaraı asfalttyń tómengi jáne joǵarǵy qabattary tóselip, jol belgileri týraly aqparattar qoıylady.

Sondaı-aq, Qazaly aýdanyndaǵy «Áıteke bı – Basyqara», Jalaǵashtaǵy «Samara – Shymkent-Eńbek – Eset batyr – Jańadarııa» jáne Jańaqorǵan aýdandaryndaǵy «Samara – Shymkent – Ekpindi» avtojoldarynyń boıyndaǵy kópirlerdi qaıta jańartý jumystary jalǵasýda.

Osy rette jumys sapasy tapsyrys berýshiniń, tehnıkalyq qadaǵalaýdyń jáne «Jol aktıvteri sapasynyń ulttyq ortalyǵy» RMK-nyń turaqty baqylaýynda ekenin aıta ketken jón.

Aıta keterligi, Qyzylorda oblysynda jyl sońyna deıin 37 avtojol jobasy júzege asyrylmaq. 2022 jyly aýdandyq mańyzy bar joldardyń 122 km jáne oblystyq mańyzy bar joldardyń 85 shaqyrymy jóndelip jatyr. Sonymen birge 8 nysan boıynsha qurylys jáne rekonstrýktsııa jumystary júrgizilýde.