Qyzylorda oblysynda kelesi jyly 128 nysannyń qurylysy júrgiziledi
Jıynda kásipkerlerge salyqtyq ákimshiliktendirý, júrgiziletin qurylys jumystarynyń jospary men keler jyldan bastap memlekettik satyp alý salasyndaǵy zańnamaǵa engiziletin ózgerister túsindirildi.
Memlekettik kirister departamentiniń basshysy Ǵanı Amanov kásipkerler salyqtyq túsimderdi ýaqytyly jáne ashyq túrde júrgizýi qajet ekenin jáne salyq bazasyn ulǵaıtýǵa yntaly merdigerlerge memleket tarapynan qoldaý baryn aıtty.
Al, oblystyq qurylys, sáýlet jáne qala qurylysy basqarmasynyń basshysy Erlan Tórálıev aldaǵy jylǵa qurylys jumystary aýqymdy kólemde, ıaǵnı memlekettik bıýdjetten áleýmettik nysandar men turǵyn úı qurylysyna barlyǵy 41,6 mlrd teńge bólingenin tilge tıek etti. Bul qarjyǵa oblysta 128 nysannyń qurylysy júrgizilmek. Sondyqtan merdigerler men tehnıkalyq qadaǵalaýshy mekemelerdiń jaýapkershiligi qatań qaralady.
Jıynda sóz alǵan memlekettik satyp alý basqarmasynyń basshysy Baýyrjan Shámenov oblys ákiminiń bastamasyna sáıkes Qarjy mınıstrligimen birlesken jumystar nátıjesinde keler jyldan bastap konkýrsqa túsken jeńimpazdardy anyqtaýda jergilikti mekemelerge basymdyq beriledi. Bul úshin krıterııge ózgerister engizildi.
Oblys ákimi Nurlybek Nálibaev jańa ózgerister aımaqtyń ónim berýshileriniń jeńiske jetýin jáne jumys kólemin qosalqy merdigerge berýin azaıtyp, óńirge salyq túsimderin kóbeıtedi dedi. Al, obektileri aıaqtalmaǵan merdigerdiń jeńimpaz bolý múmkindigi tómendeıdi. Bul óz kezeginde áleýetti ónim berýshiler arasynda jumystardy, qyzmetterdi teń bólýge jáne shartty óz merziminde oryndaýǵa jol ashady.
«Budan bylaı aýdan jáne qala ákimdikteri memlekettik satyp alý konkýrstaryn uıymdastyrmaıdy. Memlekettik satyp alý protsesteri tolyqtaı ortalyqtandyrylyp, basqarma arqyly júrgiziledi. Bul salaǵa basqarma basshysy retinde bilikti zańger Baýyrjan Shámenovty taǵaıyndap, jumystyń sapaly ári ádil ótýine naqty talap qoıdyq. Sondyqtan salynatyn árbir nysan sapaly jáne óz merziminde aıaqtalýy kerek», - dedi oblys ákimi Nurlybek Nálibaev.
Basqosýda aımaq basshysy máslıhat sessııasynda úsh jyldyq bıýdjet 520,7 mlrd teńge kóleminde bekitilgenin atap ótip, damý shyǵystarynyń úlesi 44,5 mlrd teńgege jetkenin tilge tıek etti. Bul ótken jyldyń bekitilgen bıýdjetimen salystyrǵanda 3,5 esege artyq.
Óńirde qurylys-montajdaý jumystarynyń iske asyrylýyna arnalatyn jobalarǵa barlyǵy 83 mlrd teńge qarjy bólingen. Oblys ákimi bul qarjyny 114,5 mlrd teńgege deıin ulǵaıtýǵa múmkindik bar ekenin atap ótti.
Aımaq basshysy týǵan jeriniń damýyna janashyrlyq tanytyp, ortaq iske birikken kásipkerlerge shynaıy alǵysyn bildirip, árdaıym birlesip jumys isteýge daıyn ekenin jetkizdi. Bıyldyń ózinde óńirde metsenattar men kásipkerler 9 mlrd teńgeden asatyn demeýshilik jasap, mańyzdy jobalardyń júzege asýyna qoldaý kórsetti.
Máselen, «Balalar jylynda» demeýshilerdiń qoldaýymen quny 1,6 mlrd teńgeni quraıtyn 80 sport-oıyn alańy tartý etildi, al Jańaqorǵan aýdanynda quny 790 mln teńge bolatyn zamanaýı demalys parki ashyldy. Syrdarııa aýdanynda, Naǵı Іlııasov aýylynda quny 350 mln teńgeni quraıtyn «Eńbekshiler parki» boı kóterse, Aral aýdanynda «Balyqshylar monýmenti men alleıasy ashyldy. Munan bólek, apatty dep tanylǵan Toqabaı aýylyndaǵy mektep jeke ınvestor esebinen 500 mln teńge qarjyǵa qaıta salynýda.
Bıyl quny 1,6 mlrd teńgeni quraıtyn Neke saraıynyń, 3,7 mlrd teńge bolatyn 1000 oryndyq Óner ortalyǵynyń jáne quny 2,7 mlrd teńgeni quraıtyn Qan ortalyǵynyń qurylysy bastaldy.
Belgili kásipker Marat Dúısenbaevtyń demeýshiligimen oblys ortalyǵynda quny 1,5 mlrd teńgeni quraıtyn «Anaǵa taǵzym» ortalyǵynyń qurylysy júrgizilýde.
Nurlybek Nálibaev qalanyń negizgi qaqpasy sanalatyn áýejaıda qaıta jańaratynyn tilge tıek etti. Metsenat Bolat Ótemuratov qorynyń qoldaýymen quny 12 mlrd teńge bolatyn «Qorqyt ata» áýejaıynyń jańa termınaly salynady. Qazirgi tańda jobalaý jumystary aıaqtaldy. Kelesi jyly aqpan aıynda qurylysy bastalyp, 2024 jyly el ıgiligine beriledi. Al, demeýshilerdiń kómegimen 100 mln teńgege qazirgi termınalǵa jóndeý jumystary júrgizilip, áýejaı alańy jańartyldy.
Oblys ákimi temir jol vokzaly men avtovokzal ǵımarattaryn jóndeý jumystaryna nıetti kásipkerlerge árdaıym qoldaý bolatynyn jetkizip, jerlesterin týǵan jerdi damytý isine úles qosýǵa shaqyrdy.
Óńirdiń Túrkistan oblysymen shekaralasatyn tusynan demeýshi esebinen quny 200 mln teńgege kireberis qaqpasy boı kóterýde. Nysan jyl aıaǵyna deıin paıdalanýǵa beriledi.
Munan bólek, Qyzylordada «Qazgermunaı» birlesken kásiporny basshylyǵymen kelisim nátıjesinde zamanaýı úlgidegi «Oqýshylar Saraıynyń» jáne «Saýts Oıl» kompanııanyń demeýshiligimen 7 myń adamǵa arnalǵan «Qaısar» fýtbol komandasynyń jańa stadıonynyń qurylysy salynbaq.
Jıyn sońynda aımaq basshysy qala jáne aýdan ákimderine jáne qurylysshylar qaýymyna árbir jańa nysan halyqqa qolaıly jerden salynýy qajet ekenin basa aıtty. Bul rette jobalaý jumystaryna jetkilikti deńgeıde mán berip, qurylystyń sapaly aıaqtalýy basty shart ekenin eske saldy.