Qyzylorda oblysynda qatty jelden úılerdiń shatyry ushty

QYZYLORDA. QazAqparat - Qyzylorda oblysy Jalaǵash aýdanynda qatty jel turǵyn úı shatyrlaryn ushyryp áketti, dep habarlaıdy QazAqparat tilshisi.

Oqıǵa 6 shildede jergilikti ýaqytpen saǵat 14.30 shamasynda boldy.

Aýdan ortalyǵyndaǵy kóppáterli, «Qyzylorda sý toraby» memlekettik mekemesine tıesili turǵyn úılerdiń shatyrlary ushqan.

«Kóppáterli úıdiń shatyry jáne elektr baǵanasy sol aýmaqta ornalasqan avtoturaqtaǵy 2 avtokóliktiń ústine túsken. Sondaı-aq, «Qyzylorda sý torabyna» 211-beket basynda ornalasqan turǵyn úı shatyrynyń jartysy jerge qulaǵan», - dedi oblystyq tótenshe jaǵdaılar departamentiniń bólim bastyǵy Nurbol Isanov.

Vedomstvo oqıǵa ornynda qaza bolǵandar men zardap shekkender joq ekenin málimdedi.

Jergilikti atqarýshy organdar komıssııasy jumys istep jatyr.

«Oqıǵa ornyna aýdan ákimdiginen, aýdan ákimdiginiń derbes bólimderinen 35 adam 5 avtokólik jumyldyrylǵan. Oǵan aýdandyq tótenshe jaǵdaılar jáne polıtsııa bólimderi, aýdandyq jelilik tehnıkalyq ýchaskesi, aýdandyq elektr taratý mekemesinen mamandar qatysty. Qatty jeldiń áserinen bolǵan jaıttardan zardap shekken adam joq»,- dep málim etti aýdan ákimdiginen.

Eske salsaq, budan buryn Qyzylordada qatty ystyqtan qalanyń birqatar bóligi jaryqsyz qalǵan edi.