Qyzylorda oblysynda kásipkerlik salasynda 8 myńǵa jýyq jańa jumys orny ashyldy
Óńirde bir jyl ishinde shaǵyn jáne orta kásipkerlik salasynda 7 679 jańa jumys orny ashylǵan. Ótken jylmen salystyrǵanda ósim - 8,5%.
«Memleket pandemııa kezinde kásipkerlerge aýqymdy qoldaý kórsetip, salyqtan bosatty. Oblysta 460 kásipkerlik sýbektiniń nesıeleri boıynsha tólemi keıinge shegerildi. Ekonomıkanyń zardap shekken salalaryndaǵy 40 kásipkerdiń joǵary paıyzben alynǵan nesıesi 6%-ǵa deıin sýbsıdııalandy. Aınalym qarajatyn jeńildetip berý jónindegi nesıelendirý baǵdarlamasy iske qosyldy. Shekteý sharalary kezeń-kezeńimen alynyp, rettelip jatyr», - dedi Qyzylorda oblysy kásipkerler palatasynyń dırektory Ǵalymbek Jaqsylyqov.
Qazir aımaqta kásipkerlerdiń sany artyp keledi. Bıylǵy jyldyń 1 tamyzyndaǵy málimet boıynsha oblysta jumys istep turǵan kásipkerlik sýbektileriniń sany 50 357-ge jetti. Ol byltyrǵy osy kezeńmen salystyrǵanda 9,1 %-ǵa nemese 4 204 nysanǵa artqan.
2019 jyldan bastap iske asa bastaǵan «Qarapaıym zattar ekonomıkasy» baǵdarlamasyn oryndaý barysynda oblysta 10 mlrd teńgeni quraıtyn 121 joba iske qosyldy. Osy jobalardyń sheńberinde 589 jumys orny ashyldy.
Bıyl «Atameken» Ulttyq kásipkerler palatasy men oblystyq ákimdik «Atameken Qyzylorda» mıkroqarjy uıymyn qurdy. Bul qarjy uıymy «Bastaý Bıznes» jobasynyń túlekterin nesıelendiredi. Bıylǵa 1 mlrd teńge qarjy qarastyrylǵan, oǵan 238 joba nesıelendiriledi dep josparlanyp otyr.
Aıta ketsek, Prezıdent Joldaýy negizinde Qyzylorda oblysynda óńirlik damý baǵdarlamasy qabyldanady.