Qyzylorda oblysynda geoarheologııalyq zertteý jumysy júrgiziledi
Bul jumystardy ál-Farabı atyndaǵy Qazaq ulttyq ýnıversıtetiniń halyqaralyq «Geoarheologııa» ǵylymı-zertteý zerthanasy atqaratyn boldy. Zerthana budan onshaqty jyl buryn qurylǵan. Alǵashqyda oǵan tarıh ǵylymdarynyń doktory, professor Jáken Taımaǵambetov jetekshilik etti. Qazir zerthanaǵa tarıh ǵylymdarynyń kandıdaty, dotsent Ǵalymjan Bekseıitov basshylyq jasaıdy.
Tarıh ǵylymdarynyń doktory, ál-Farabı atyndaǵy QazUÝ professory Dosbol Baıqonaqovtyń aıtýynsha, budan buryn zerthananyń negizgi jumysy Jetisý jerinde júrgizilip keldi. Alaıda mamandardy Syr óńiri tarıh qoınaýy da ótken jyldardan beri qyzyqtyryp otyr.
«Syr óńirin adamzat balasy ilki zamandardan beri mekendeýde. Munda adam balasy tas dáýiri, paleometall kezeńi, qola ǵasyry, erte temir dáýirinde tirshilik etkendigi arheologııalyq, etnografııalyq jáne tarıhı derektemeler negizinde anyqtalǵan. Zerthana músheleri Syr óńirindegi eskertkishterdi birneshe jyldan beri zertteýge azdy-kemdi at salysyp keledi. Alaıda kóbine zertteý jumystary arheologııalyq barlaý sheńberinde júrgizilgen bolatyn. Ótken jyly Qyzylorda oblysynyń birneshe aýmaǵynan jańa eskertkishter dalalyq barlaý jumystary barysynda anyqtaldy. Bul izdenisterge jergilikti arheologtar, «Geoarheologııa» zerthanasynyń qyzmetkerleri kúsh salyp, tas jáne qola dáýirine jatatyn birneshe arheologııalyq eskertkishter oryndary anyqtalǵan bolatyn. Ásirese buryn belgisiz bolyp kelgen tas dáýirleri men qola ǵasyrynyń eskertkishteri Aral men Qazaly aýdandary aýmaǵynan tabylyp otyr», - dedi ol.