Qyzylorda oblysynda eki aýylda ákim saılaýy ótip jatyr
Búgin Qyzylorda oblysynyń Jańaqorǵan aýdanyna qarasty Súttiqudyq jáne Qaratóbe aýyldyq okrýgterinde ákim saılaýy bolyp jatyr. Jergilikti turǵyndar tańerteń saǵat 7.00-den bastap №309, №322 saılaý ýchaskelerine kelip, tańdaý jasaı bastady. Alǵashqy kelgen saılaýshylarǵa syılyqtar berildi.
«Súttiqudyq aýyldyq okrýgindegi 1 185 saılaýshy ózin-ózi usyný tártibimen qatysyp jatqan 2 azamatqa daýys berip jatyr. Al, Qaratóbe aýyldyq okrýginde ózin-ózi usyný jolymen kandıdat bolǵan 3 kandıdatqa 970 saılaýshy daýys beredi. Ákim saılaýyna qatysyp jatqan jergilikti turǵyndardyń belsendiligi joǵary», - dedi oblystyq saılaý komıssııasynan.
Eske salsaq, jyl basynan beri Qyzylorda óńirinde 10 aýyldyń ákimi saılandy. Olardyń qatarynda Aral aýdanynyń Jańaqurylys jáne Qulandy, Qazaly aýdanynyń Aqjona, Aryqbalyq, Jalaǵash aýdanynyń Jańadarııa, Aqqum, Myrzabaı ahýn, Syrdarııa aýdanynyń Aqjarma, Jańaqorǵan aýdanynyń Jańaryq jáne Qarmaqshy aýdanynyń Aqtóbe aýyldyq okrýgi ákiminiń saılaýy bar.
Bıyl Prezıdent tapsyrmasyna sáıkes aýdan ákimderiniń saılaýy ótedi. Qyzylorda óńirinde turǵyndar 2 aýdannyń ákimin tikeleı saılaıdy.