Qyzylorda oblysynda egistikke beriletin sý lımıti qysqartyldy

ASTANA. QazAqparat – Qyzylorda oblysynda sýdyń tapshylyǵynan egistik úshin beriletin lımıt qysqartyldy. Bul týraly Ekologııa jáne tabıǵı resýrstar mınıstrligi Sý resýrstary komıteti tóraǵasynyń orynbasary Seıilbek Nurymbetov málim etti, dep habarlaıdy QazAqparat tilshisi.

«Qyzylorda oblysyndaǵy Shardara qoımasynda sýdyń azdyǵyna baılanysty shildede sýarmaly jerlerdi, ásirese kúrish daqyldaryn sýmen qamtamasyz etý boıynsha shıelenisti jaǵdaıdyń týyndaýy múmkindigin joqqa shyǵarmaımyz. Bıyl atalǵan óńirde 83,9 myń ga jerge kúrish egý josparlanyp, is júzinde 88,107 myń ga jerge egildi. Bul – ótken jylmen salystyrǵanda 9,8 myń ga artyq. Aıta keteıin, mınıstrlik oblysta kúrish alqabyn qysqartý qajettigi týraly buǵan deıin birneshe ret eskertken bolatyn», - dedi Seıilbek Nurymbetov ortalyq kommýnıkatsııalar qyzmeti alańynda ótken baspasóz máslıhatynda.

Odan bólek, mınıstrlik ókili Jambyl jáne Túrkistan oblysyndaǵy egistikti sýmen qamtý máselelerine toqtalyp ótti.

«Qyzylorda oblysynda sý tapshylyǵyna baılanysty basseındik ınspektsııamen turaqty sýarý úshin sýdy paıdalaný lımıti qysqartyldy. Al, Almaty jáne Jetisý oblysy boıynsha sý sharýashylyǵy jaǵdaıy turaqty. Atalǵan oblystardaǵy barlyq sý qoımalary vegetatsııalyq kezeńge bekitilgen kestege sáıkes jumys isteıdi», - deıdi ol.