Qyzylorda oblysynda bıyl týberkýlez shaldyǵýdyń 330 jaǵdaıy tirkeldi
Oblysta bıylǵy jyldyń 9 aıynda týberkýlez shaldyǵýdyń 330 jaǵdaıy tirkelgen. Bul ótken jyldyń osy kezeńimen salystyrǵanda 21,6%-ǵa artqan. Olardyń basym kópshiligi - tynys alý joldarynyń týberkýlezi.
«Syrqattanýshylyq deńgeıi Jalaǵash aýdanynda bir deńgeıde qalyptasqan. Al qalǵan aýdandarda epıdemıologııalyq ahýal turaqsyz. Týberkýlezdiń ashyq túrimen aýyrǵandar 1,3 esege joǵarylaǵan. Іndetke shaldyqqandardyń 66%-y áleýmettik belsendi toptar, ıaǵnı 18-64 jas aralyǵyndaǵy turǵyndar. Syrqattanýshylyqtyń 5,4%-y - 14 jasqa deıingi balalar bolsa, 5,4% jasóspirimder arasynda tirkelgen», - dep málim etti Qyzylorda oblysynyń sanıtarııalyq-epıdemıologııalyq baqylaý departamenti.
Epıdemıologııalyq taldaý nátıjesi kórsetkendeı, týberkýlezge shaldyǵý kóp jaǵdaıda jumyssyzdar jáne zeınetkerler arasynda kóp ekeni anyqtaldy.
«Aýrýdyń asqyný jáne ólim-jitim sebepteri aýyrý qaýpi joǵary «táýekel» toptaǵy kontıngentterdiń ýaqytyly flıýrografııalyq tekserilmeýi, aýrý klınıkasy paıda bolǵanymen turǵyndardyń medıtsınalyq kómekke kesh júginý saldarynan bolýy yqtımal», - dedi atalǵan vedomstvodan.