Qyzylorda oblysynda bıyl sý aıdyndarynda 26 adam qaza boldy
Jyl basynan beri oblys aýmaǵyndaǵy sý aıdyndarynda sońy ólimge ákelgen 26 oqıǵa tirkeldi. Onyń 19-y eresek adam bolsa, 7-ýi bala. Al byltyr dál osyndaı 30 jaǵdaı tirkeldi. Onyń 9-y bala.
«Oqıǵalardyń basym bóligi Syrdarııa ózeni men úlkendi-kishili kanaldarda tirkelgen. Jazǵy sýǵa shomylý maýsymy bastalar tusta jedel qutqarý jasaǵynyń júzý quraldary, súńgýirlik jaraqtary men jabdyqtary daıyndyqqa keltirilgen. Atap aıtqanda, 69 qutqarýshy, 19 avtokólik, 23 júzý quraly men 34 súńgýirlik jaraq daıyndyqtan ótken. Súńgýir avtokólikter qajetti qutqarý qural-jabdyqtarymen, qutqarý keýdesheleri jáne sheńberimen jaraqtandyrylǵan», - dedi oblystyq Tótenshe jaǵdaılar departamentiniń azamattyq qorǵanys basqarmasy bastyǵynyń mindetin atqarýshy Jandos Júginisov.
Sýǵa shomylý maýsymynda aımaqta 4 kommýnaldyq jaǵajaı jumys istedi. Olardyń qatarynda Shıeli aýdanyndaǵy «Aqorda», Syrdarııa aýdanyndaǵy «Qalǵandarııa», Qarmaqshy aýdanyndaǵy Muratbaev jáne Qazaly aýdanyndaǵy «Qashqan sý» jaǵajaıy bar.
Eske salsaq, budan buryn Qyzylorda oblysynda joǵalǵan 7 jasar qyzdyń denesi kanaldan tabyldy.