Qyzylorda oblysynda bıyl 9 myńǵa jýyq bala lagermen qamtylady
Oblysta oqýshylardy qabyldaıtyn barlyǵy 10 lager balalarǵa qyzmet kórsetedi. Olardyń arasynda 7-ýi memlekettik bolsa, qalǵan 3-ýi jeke lager. Lagerler 2- maýsymnan bastap jas órenderge saltanatty túrde esigin aıqara ashty. Endigi kezekte 7 aýysym boıynsha 8890 bala tynyǵýyna múmkindigi bar.
Oǵan qosa mektepterdiń barlyǵynda kúndizgi tynyǵý lageri iske qosylady. Nátıjesinde barlyǵy 98 myńǵa jýyq jazǵy tynyǵý oryndarymen qamtylady. Alǵashqy kezekte tynyǵý oryndaryna ata-anasynyń qamqorlyǵynsyz qalǵan, kópbalaly jáne turmysy tqmen otbasylardan shyqqan balalar barady.
Sondaı-aq, jergilikti metsenattar men kásipkerlerdiń demeýshiligimen 1326 bala oblystan tys jerdegi demalys oryndaryna barmaq. Oǵan «Qazgermunaı», «Qazatomprom», «RZA», «SKZ-U», «Gejýba tsement zavody», «Qyzylkum», «Tań LTD», «Tilep» JShS-teri qoldaý kórsetti.
Aıta ketsek, bıylǵy jaz mezgilinde «Jazdyq joldama» áleýmettik jobasy júzege asyrylady. Bul joba QR Oqý-aǵartý mınıstrligi jáne «Qazaqstan halqyna» qoǵamdyq qory tarapynan uıymdastyrylyp otyr. Nátıjesinde aýyldyń daryndy balalarynyń ıntellektýaldyq, shyǵarmashylyq qabiletin jetildirý jáne qoldaý kórsetiledi. Bul boıynsha oblysqa 600 orynǵa kvota bólingen. Sol arqyly Almaty qalasyndaǵy «Spýtnık» balalar saýyqtyrý lagerinde 320, Jańaqorǵan aýdanyndaǵy oblystyq olımpıadalar jáne qosymsha bilim berý ortalyǵynda 280 oqýshynyń demalýyna múmkindigi bar.
Qyzylordalyq jas órender jaz mezgilinde Syr óńiriniń tarıhı oryndarymen tanysa alady. Oǵan qosa Astana, Baıqońyr ǵarysh aılaǵy, Shymkent (Aqmeshit úńgiri, Qazyǵurt, Domalaq Ana) Taraz (Aısha bıbi, Qarahan kesenesi) Saýran, Syǵanaq qalashyǵy men Túrkistan oblysynyń kıeli jerlerine (Otyrar, Arystanbab kesenesi, Qoja Ahmet ıAsaýı, Gaýhar ana kesenesi), Qorqyt ata eskertkish, ekskýrsııalar men arnaıy týrlar uıymdastyrylady.
Jazǵy demalysta balanyń bos ýaqytyn tıimdi uıymdastyrýda tıisti mekemeler de qarap qalmaıdy. Túrli tanymdyq jáne sporttyq sharalardan bólek, úıirmeler jyl boıy jumys isteıdi.
Maýsym aıynda aımaq basshysynyń qoldaýymen oblys ákiminiń júldesine arnalǵan «Aıtys olımpıadasy» oblystyq balalar aıtysy ótkiziledi. Jalpy oblys mádenıet úıleri men klýbtarynda 583 bala men jasóspirimderge arnalǵan úıirme jumys jasaıdy, oǵan 7093 bala qamtylǵan.
Eske salsaq, saýyqtyrý ortalyqtarynyń jazǵy demalysqa daıyndyǵyna monıtorıng júrgizilýde.