Qyzylorda oblysynda bıyl 355 shaqyrym jol jóndeledi
Atalǵan jumystar «Nurly jol» jáne «Óńirlerdi damytý», «Aýyl - el besigi» baǵdarlamalary aıasynda júrgiziledi. Bul maqsatta respýblıkalyq jáne oblystyq bıýdjetten qarjy bólinedi. Avtomobıl joldarymen qatar kópir ótkelderi de jóndelmek.
Máselen, «Qyzylorda-Jalaǵash» jolynyń 91 shaqyrymyn jóndeýge 3,1 mlrd. teńge qaralǵan. Qazirge deıin oǵan respýblıkalyq bıýdjetten 1 mlrd. teńge bólindi. Ázirge bólingen qarjy joldyń eń nashar bólikterin jóndeýge baǵyttalýda. Bıyl Qyzylorda qalasynan Tereńózek kentiniń kire berisine deıingi tas jol jóndeledi. Taǵy aıta keterligi, Jalaǵash kentin «Samara-Shymkent» avtodálizimen baılanystyratyn jol da jóndeý kórmek. Al joldyń qalǵan 61 shaqyrymy aldaǵy jyly tolyq jóndeýden ótkiziledi.
«Oblys ortalyǵyndaǵy Sultan Beıbarys kóshesinen Qyzyljarma kanalyna deıingi magıstraldy kósheniń qurylysyn aıaqtaýǵa qarjy qaralǵan. Ol Syrdarııa ózeniniń sol jaǵalaýyndaǵy qorǵanys bógeti boıymen júrgiziledi. Bul joldy tamyz aıynyń aıaǵynda paıdalanýǵa berý josparlanýda. Al «Edelveıs» saıajaı aýmaǵy sol jaǵalaý bóligindegi magıstraldyń qurylysyna da qarjy qaralyp, jóndeý jumystary bastalyp ketti. «Aýyl - el besigi» baǵdarlamasy boıynsha da eldi mekenderdiń uzyndyǵy 80 shaqyrymnan astam 64 kóshesine ortasha jóndeý jumystary júrgizilýde», - dedi oblystyq jolaýshylar kóligi jáne avtomobıl joldary basqarmasynyń basshysy Murat Tleýmbetov.
Aıta ketý kerek, osy jyldyń 7 aıynyń qorytyndysymen 8,1 mlrd teńge ıgerilip, aımaqta 127 shaqyrym avtomobıl joly jóndeýden ótti.