Qyzylorda oblysynda bıyl 33 myń turǵyn tabıǵı gazǵa qol jetkizedi
Kezdesý barysynda vıtse-mınıstr aımaqtaǵy ken oryndarynyń jumysy men munaı óndirýdegi jalpy kórsetkishterge toqtaldy. Elimiz boıynsha Qyzylorda oblysy munaı óndirýden 5-shi óńir. Tıisinshe, elde óndirilgen munaıdyń 4,8 paıyzy óńir (Qyzylorda oblysy) úlesine tıesili.
Alaıda óńirdegi ken oryndarynda munaı óndirýdiń jyl saıynǵy tabıǵı tómendeýi baıqalady. Sol sebepti Energetıka mınıstrligi men Ulttyq ekonomıka jáne qarjy mınıstrligi birlesip jer qoınaýyn paıdalanýshylardy qoldaý jáne ken oryndarynyń ómirlik tsıklin uzartý maqsatynda qaıta ınvestıtsııalaý máselesin pysyqtaýda. Sondaı-aq, memlekettik teńgerimdegi gazdyń alynatyn qory shamamen 39 mlrd.tekshe metrdi quraıdy. Onyń 80 paıyzy bos gaz bolyp tabylady. Degenmen, ony óndirý ekonomıkalyq turǵyda tıimsiz. Osy oraıda vıtse-mınıstr jer qoınaýyn paıdalanýshylardy gaz óndirý men qaıta óńdeý kólemin ulǵaıtýǵa, sondaı-aq gaz satyp alýdyń jańa formýlasy ázirlengenin atap ótti.
- Búginde Qyzylorda oblysynyń gazdandyrý deńgeıi 70 paıyzdy quraıdy. Sáıkesinshe, 584 myń adam tabıǵı gazben qamtamasyz etilgen. Bıyl Energetıka mınıstrliginiń bıýdjettik baǵdarlamasy aıasynda Qyzylorda oblysy boıynsha 13 joba iske asyrylmaq. Jalpy osy jyly Syr óńirindegi Tóretam, Aqaı, Birlik, Qyrash, Jaıylma, Eńbekshi, Abaı, Dosan, Shalhııa, Quttyqoja, Keıden jáne Jıdeliaryq eldimekenderine gaz jelileri júrgiziledi. Osyǵan sáıkes, shamamen 33 myń adam tabıǵı gazǵa qol jetkizetin bolady.
Al suıytylǵan gazǵa keletin bolsaq, óńirde 6 gaz toltyrý stantsııasy jáne 178 avtomobılge gaz quıý stantsııasy bar. Bıyl «Suıytylǵan munaı gazynyń aınalymyn retteý protsesteriniń reınjınırıngi máseleleri boıynsha» Zań qabyldanady dep kútilýde, - dedi vıtse-mınıstr Ashat Hasenov.
Kezdesý barysynda oblys turǵyndary ózderiniń suraqtaryn qoıyp, usynys-pikirlerin jetkizdi. Jıynnan keıin vıtse-mınıstr BAQ ókilderine arnaıy brıfıng ótkizdi.