Qyzylorda oblysynda bir aıda 9 adam sýǵa ketti

QYZYLORDA. QazAqparat - Qyzylorda oblysynda maýsym aıynda 9 adam sýǵa ketti. Onyń ishinde tórteýi - bala. Bul tótenshe jaǵdaılar salasy mamandaryn alańdatyp otyr, dep habarlaıdy QazAqparat tilshisi.

Qyzylorda oblysynda jyl basynan beri 20 adam sýǵa batyp ketken. Onyń ishinde jeteýi - bala.

Byltyr óńirde 28 adam osyndaı oqıǵa saldarynan kóz jumǵan. Olardyń arasynda 18 bala bar.

«Biz turǵyndardan sýǵa túsý kezinde barlyq qaýipsizdik sharalaryna nazar aýdarý qajettigin suraımyz. Qarapaıym erejelerdi saqtaý árbir adamnyń ómiri men densaýlyǵyn saqtaýǵa múmkindik beredi. Bul baǵytta tótenshe jaǵdaılar salasynyń mamandary túsindirme jumystaryn turaqty túrde júrgizip keledi. Soǵan qaramastan oqys oqıǵalarǵa jol berilip jatady», - dedi Qyzylorda oblystyq tótenshe jaǵdaılar departamenti órt sóndirý jáne avarııalq-qutqarý jumystary qyzmetiniń baspasóz hatshysy Álııa Erejepova.

Vedomstvo málimetinshe, búgin, 30 maýsymda saǵat 14.58-de Jańaqorǵan aýdany Ózgent aýyly aýmaǵyndaǵy Aqsýat sýarmaly kanalyna 2003 jylǵy jigit sýǵa batyp ketken.

Oqıǵa ornyna Jedel qutqarý jasaǵynan 6 qutqarýshy, 1 tehnıka,1 motorly qaıyq, 3 súńgýirlik top jetti. Іzdestirý jumystary bastalyp ketti.

Eske salsaq, budan buryn Qyzylordada 4-qabattan qulap ketken úsh jasar sábı aman qalǵan edi.