Qyzylorda oblysynda balabaqshada búldirshinder edende jatýǵa májbúr bolǵan

QYZYLORDA. QazAqparat - Áleýmettik jelide Qyzylorda oblysynda balabaqsha búldirshinderi oryn tapshylyǵynan edenge jatýǵa májbúr bolǵan degen aqparat tarady. Buǵan baılanysty oblystyq bilim basqarmasy tekserý jumystaryn bastap ketti, dep habarlaıdy QazAqparat tilshisi.

Áleýmettik jelide Qyzylorda oblysy Qazaly aýdanyndaǵy balabaqshada búldirshinderdiń oryn tapshylyǵynan edende jatýǵa májbúr bolǵany jóninde aıtylyp, sýretteri jarııalanǵan. Sondaı-aq, sýrette sábılerdiń bir adamdyq orynda eki-úsheýden jatqanyn kórýge bolady

Buǵan baılanysty oblystyq bilim basqarmasy túsinikteme berdi.

«Qyzylorda oblysynyń bilim basqarmasy atalmysh máselege qatysty tómendegini málimdeıdi. Oblystyq bilim basqarmasy búginde arnaıy jumysshy tobyn quryp, aýdandaǵy balabaqshaǵa zerdeleý jumystaryn júrgizýde.

Atalǵan zerdeleý jumystarynyń qorytyndysy boıynsha kemshilikter anyqtalǵan jaǵdaıda tıisti quzyrly organdarǵa usynylyp, zań aıasynda sheshimder qabyldanady», - dep jazylǵan basqarma habarlamasynda.

Eske salsaq, Qyzylordada jiti ishek aýrýlaryna ushyraǵandardyń 87%-yn balalar quraıdy.