Qyzylorda oblysynda aýyz sý sapasynan kemshilikter tabyldy

QYZYLORDA. QazAqparat - Qyzylorda oblysynda aýyz sýdyń mıkrobıologııalyq jáne sanıtarlyq-hımııalyq kórsetkishteri boıynsha sáıkessizdikter anyqtaldy, dep habarlaıdy QazAqparat tilshisi.

Oblysta sanıtarııalyq-epıdemıologııalyq baqylaý departamentiniń qadaǵalaýynda 205 sýmen jabdyqtaý obektisi bar. Onyń ishinde 171-i ortalyqtandyrylǵan, 34 -i ortalyqtandyrylmaǵan sýmen jabdyqtaý obektileri.

Óńir turǵyndarynyń 97,8% ortalyqtandyrylǵan aýyz sý júıesimen qamtylǵan. Al 2,1% ortalyqtandyrylmaǵan sýdy paıdalansa, tasymal sý iship otyrǵandar úlesi - 0,1%.

«Bıylǵy jyldyń 6 aıynda ortalyqtandyrylǵan sýmen jabdyqtaý obektilerinen mıkrobıologııalyq kórsetkishterin tekserýge 424 sý synamasy alyndy. Onyń 87-i talaptarǵa sáıkes kelgen joq. Mundaı kemshilikter Qazaly, Qarmaqshy, Jańaqorǵan aýdandarynan anyqtaldy. Al sanıtarlyq-hımııalyq kórsetkishteri boıynsha 55 sáıkessizdik anyqtaldy. Bul kemshilik Qazaly, Qarmaqshy, Jalaǵash, Shıeli aýdandary jáne Qyzylorda qalasynda baıqaldy. Sanıtarııalyq-hımııalyq kórsetkishterde sý quramyndaǵy sýlfattardyń, kermektiligi, qurǵaq qaldyqtar men hlorıdterdiń normadan joǵary ekeni anyqtaldy», - dep málim etti oblystyq sanıtarııalyq-epıdemıologııalyq baqylaý departamentinen.

Vedomstvo málimetinshe, jol berilgen kemshilikter jáne erekshe tártip tekserýlerqorytyndysy boıynsha 1,3 mln teńge kóleminde 15 aıyppul salyndy.

Oǵan qosa 6 sanıtarııalyq nusqama berildi.

Eske salsaq, budan buryn Qyzylordada et ónimderiniń jartylaı fabrıkattarynan ishek taıaqshalary bakterııasy anyqtaldy.