Qyzylorda oblysynda aýyldardy ınternetpen qamtý 80% paıyzǵa jetkiziledi

QYZYLORDA. QazAqparat - Qyzylorda oblysynda bıylǵy jyldyń sońyna deıin eldi mekenderdi ınternetpen qamtý 80 paıyzǵa jetkiziledi, dep habarlaıdy QazAqparat tilshisi.

Oblysta atalǵan baǵytta naqty jumystar atqarylyp keledi. 23 aýyldyq eldi mekende uıaly baılanys operatorlarynyń bazalyq stantsııasyn salý josparlanýda. Osylaısha jyl sońyna qaraı aýyldyq jerlerdi ınternet jelisimen qamtý 80 paıyzǵa jetkiziledi.

«Bul, aýyl turǵyndarynyń elektrondyq memlekettik qyzmetterge, onlaın-saýdaǵa, túrli bilim platformalaryna, medıtsınalyq qyzmetterge jáne ózgesine qoljetimdilikti qamtamasyz etedi. Óńirdegi 14 eldi mekenge ınternet jelisiniń jyldamdyǵyn arttyrý úshin talshyqty-optıkalyq kabel aparyldy. Sondaı-aq, 70 eldi mekenniń 23-inde antenna-dińgek qurylysyn salý josparlanýda», - dep málim etti Qyzylorda oblysy ákimdiginen.

Qazirgi tańda provaıderlik kompanııalardyń ókilderi ınternetti qamtamasyz etýge barynsha kúsh salýda. Sondaı-aq, uıaly baılanys kompanııalary qolda bar 2G radıoreleıkalaryn 3G-ge jańǵyrtýǵa mán berip otyr. Sondaı-aq, olardyń tarapynan qoldanystaǵy bazalyq stantsııalaryn basqa da kompanııalarǵa qosý jumystary atqarylýda. Nátıjesinde 2021 jyly 47 aýyldyq eldi mekendi ınternetpen qamtamasyz etý boıynsha másele sheshimin tabady.

Qyzylorda qalasyna irgeles jatqan «Sabalaq», «ıAgodka» jáne PMK-29 saıajaılaryna antenna ornatý úshin qujattar daıyndalýda. Al oblys ortalyǵyndaǵy «Báıterek» shaǵynaýdanyna 2021 jyly 2 stantsııa ornatylady.