Qyzylorda oblysynda Aral teńizi kúni atap ótildi
2017 jyly Qyzylorda oblysy ákimdigi men Halyqaralyq Araldy qutqarý qory atalmysh qor qurylǵan 26 naýryzdy Aral teńizi kúni retinde atap ótý jóninde ortaq sheshimge kelgen edi. Bul sheshimdi Halyqaralyq turaqty damý forýmy qabyldady.
Osy oraıda ataýly kún qarsańynda «Aqmeshit-Syrdarııa» ortalyq meshitiniń mańynda 800 túp alma aǵashy men úıeńki otyrǵyzyldy. A.Toqmaǵambetov atyndaǵy qalalyq mádenıet úıinde «Shalqar teńiz syr shertedi» atty merekelik kesh ótti. Іs-shara aıasynda Aral teńizi týraly fılmniń kórsetilimi, kórme men kontsert kópshilik nazaryna usynyldy.
Syr óńiriniń turǵyndary Elbasy Nursultan Nazarbaevtyń qoldaýymen ǵasyr jobasy - Syrdarııa ózeniniń arnasyn retteý jáne Aral teńiziniń soltústik bóligin saqtaý jobasynyń júzege asqanyn joǵary baǵalaıdy. 2005 jyly úlken jáne Kishi Aral arasynda 13 shaqyrymdy quraıtyn Kókaral bógetin salý arqyly oń nátıjege qol jetkizildi.
2006 jyldyń naýryzynda Kishi Aral teńiz deńgeıinen 42 metrge deıin kóterildi. Aral qalasy men teńiz arasy buryn bóget qurylysy bastalǵanǵa deıin 75 shaqyrym bolsa, búginde 17 shaqyrymdy quraıdy. Teńizdiń tuzdylyǵy aıtarlyqtaı tómendep, balyq kásibin jandandyrýǵa múmkindik paıda boldy. Jergilikti balyq ónimi qazir Polsha, Gollandııa, Germanııa, Lıtva, Grýzııa, Ýkraına, Reseı jáne Qytaı elderine eksporttaldy.