Qyzylorda oblysynda 22 bıznes joba sybaılas jemqorlyqtan qorǵalady

QYZYLORDA. QazAqparat - Qyzylorda oblysyna jumys sapary barysynda Cybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov qalalyq memlekettik mekemelerdiń qaıta qurylǵan qyzmetimen tanysyp, bıznes-qoǵamdastyqpen jáne azamattarmen kezdesti, dep habarlaıdy QazAqparat vedomstvonyń baspasóz qyzmetine silteme jasap.

Memlekettik mekemeler usynatyn qyzmettiń sapasymen tanysý maqsatynda «Open space» formatynda salynǵan «Bızneske arnalǵan úkimet» memlekettik korporatsııasy» KE AQ-nyń Qyzylorda oblysy boıynsha fılıalyna bardy.

Qazirgi tańda, mekeme qyzmetkerleri kásipkerler men ınvestorlarǵa 18 baǵytta 90 qyzmet túri boıynsha tegin qyzmet kórsetedi (kórsetiletin 90 qyzmet túriniń 46-sy memlekettik qyzmet, 21-i elektrondyq memlekettik qyzmet).

Kásipkerlerdi qoldaýǵa arnalǵan «Bızneske arnalǵan Úkimet» biryńǵaı servıs ortalyǵy «bir tereze» qaǵıdasyna negizindelgen. 2020 jyldyń qorytyndysy boıynsha oblys kásipkerlerine 13 488 qyzmet kórsetilgen.

Budan bólek, bul ǵımaratta oblystyq kásipkerlik jáne týrızm basqarmasy, «Atameken» Ulttyq kásipkerlik palatasynyń Qyzylorda oblysy boıynsha fılıaly, «Azamattarǵa arnalǵan úkimet» memlekettik korporatsııasy» KE AQ, «Aımaqtyq ınvestıtsııalyq ortalyq «MQU» JShS, «Halyq Banki» AQ, «VTB» AQ-nyń fılıaldary men bólimsheleri, AMANAT HOME kooperatıvi ornalasqan.

Shara barysynda O. Bektenov «Qazirgi tańda kásipkerlerdiń quqyqtary men zańdy múddelerin qorǵaý – eldiń kún tártibindegi basym baǵyttarynyń biri. Memleket basshysy óziniń jyl saıynǵy joldaýynda atap ótkendeı, pandemııa kezeńinde shaǵyn jáne orta bıznes qıyn jaǵdaıǵa tap bolǵandyqtan, qoldaýǵa asa muqtaj. Osy rette, bızneske zańsyz aralasý, onyń qyzmetine kedergi keltirý «memleketke qarsy eń aýyr qylmys» retinde qabyldanýy tıis», - dep atap ótti.

Osy rette kásipkerler men ınvestorlardy sybaılas jemqorlyqqa qarsy súıemeldeıtin «Protecting business and investments» jobasyn atap ótken jón.

Qazirgi tańda agenttik jalpy somasy 16,3 trln teńgeniń 656 bıznes jobasyn sybaılas jemqorlyqqa qarsy súıemeldeıdi, onyń ishinde Qyzylorda oblysynda 554 mlrd teńgeden astam somaǵa 22 bıznes joba qorǵaýǵa alynǵan.

Shara sońynda agenttik tóraǵasynyń birinshi orynbasary atalǵan joba aıasynda súıemeldeýge alynǵan kásipkerlermen kezdesip, oblystaǵy kásipkerliktiń jaı-kúıi jaıly máselelerdi talqylady.