Qyzylorda oblysynda 18 naýqas jansaqtaý bóliminde jatyr
Ótken táýlikte óńirde 9 adam koronavırýs juqtyrdy. 2020 jyldyń naýryz aıynan beri qaterli indetke shaldyqqandar sany 23 949 adamǵa jetti.
Oblys boıynsha ınfektsııalyq statsıonarda 156 naýqas em qabyldasa, reanımatsııalyq tósek-orynda 18 naýqas jatyr.
Oblysta koronavırýsqa qarsy ımmýndaýǵa 106 ekpe kabıneti, onyń ishinde aýdandarda 91 kabınet tartylǵan. Aýdandarda, ujymdarda, adamdar kóp jınalatyn jerlerde (iri saýda oıyn-saýyq ortalyqtary, bazarlar jáne basqalary) koronavırýsqa qarsy vaktsınatsııalaý júrgizilýde. Onda arnaıy oqytylǵan medıtsınalyq mamandar halyqqa qyzmet kórsetedi.
«Oblysta vaktsınatsııanyń birinshi komponentimen egilgender sany - 422 189 adam. Ol - ekpe qabyldaýǵa qabiletti turǵyndardyń 93,3 paıyzy. Ekinshi komponentpen qamtylǵandar sany - 409 864 adam. Aımaqta sanıtarlyq epıdemıologııalyq ahýaldyń turaqtalýyna baılanysty óńir «jasyl» aımaq qatarynda. Degenmen saqtyq sharalaryna salǵyrt qaraýǵa áli erte», - dedi oblystyq densaýlyq saqtaý basqarmasy basshysynyń orynbasary Jangeldi Shaıymbetov.
Eske salsaq, Qyzylorda oblysynda 124 adam úıde oqshaýlaný tártibin buzǵan.