Qyzylorda oblysynda 18 keli keptirilgen marıhýana tasymaldaǵan azamatty ustady

ASTANA. QazAqparat - Qyzylorda oblysynyń patrýldik polıtsııa qyzmetkerleri «Qarasora – 2023» is-sharasy barysynda 18 keliden astam esirtki zatyn tasymaldaǵan Aqtóbe oblysynyń turǵynyn ustady, – dep habarlaıdy Polisia.kz.

«Qarasora – 2023» is-sharasy barysynda Qyzylorda oblysy Qarmaqshy aýdanynyń tusynda Shymkent – Samara tasjolynyń 637/1630 shaqyrymynda jol erejesin buzǵan Chevrolet Cobalt avtokóligin patrýldik polıtsııa rota qyzmetkerleri toqtatty.
Tekserý barysynda kólikten úlken jol sómkesine salynǵan jasyl tústi zat anyqtalyp, aıǵaq zat retinde alyndy. Saraptama qorytyndysymen alynǵan zat 18 keli 683 gramm keptirilgen marıhýana ekendigi naqtylandy. Tekserý barysynda bul sómkeniń jolaýshyǵa tıesili ekendigi anyqtaldy. Ol Aqtóbe oblysynyń turǵyny bolyp shyqty. Kúdikti ÝUI-ǵa qamaldy. Atalǵan derek boıynsha QR QK-niń 297-baby 3-bóligimen (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) sotqa deıingi tergep-tekserý áreketteri júrgizilip jatyr. Mán-jaılar anyqtalady.