Qyzylorda oblysy Jalaǵash aýdanynyń týmalary Týǵan jerlerine taǵzym etti
Aýdan ákimi Qaıratbek Sársenbaev óz sózinde Elbasynyń «Bolashaqqa baǵdar: rýhanı jańǵyrý» maqalasynyń aıasynda ótkizilip jatqan sharanyń mańyzdylyǵyna toqtaldy. Sondaı-aq Jalaǵash aýdanynan shyǵyp, kúlli qazaq jurtyna tanylǵan, ǵylymda, ónerde, mádenıet, ádebıet, sport salalarynda jáne saıasat minberlerinen boı kórsetip, el erteńi úshin ter tógip júrgen, búginde týǵan jerine kelip, taǵzym jasap otyrǵan el azamattaryna aýdan jurtshylyǵy atynan alǵysyn jetkizdi.
Shara aıasynda aýdanǵa kelgen qonaqtar mýzeı ekspozıtsııasymen tanysty. Sonymen birge oqýshylar úıinde jas sýretshilermen, mádenıet jáne ónerdi damytý ortalyǵynda jetkinshektermen kezdesý ótti. Sondaı-aq Mádenıet jáne ónerdi damytý ortalyǵynda Á.Júrgenbaev atyndaǵy aıtyskerler úıirmesiniń tusaýkeseri jáne «Jyrlaımyn seni týǵan jer» atty aqyn-jazýshylarmen júzdesý uıymdastyryldy.
Budan bólek, osy kúni Q.Qazantaev atyndaǵy Mádenıet úıinde aýdan ákimi Qaıratbek Sársenbaevtyń qatysýymen «Týǵan jerge taǵzym» atty jalaǵashtyqtardyń kezdesýi, iske asyrylatyn jobalar boıynsha memorandýmǵa qol qoıý rásimi ótti.
Respýblıkalyq aktsııa barysynda Jalaǵash aýdanynyń týmalary - Qazaqstan Jazýshylar odaǵynyń múshesi, oblystyq «Syr mektebi» gazetiniń bas redaktory Mahmutbaı Ámireuly, D.A.Qonaev atyndaǵy Taý-ken ınstıtýty «Mıneraldy shıkizattardy fızıko-hımıalyq ádispen qaıta óńdeý» zerthanasynyń jetekshisi, tehnıka ǵylymdarynyń doktory, professor Narıman Jalǵasuly, «Respýblıkalyq radıo» JShS-niń bas dırektory Mádı Manatbek, eki dúrkin «Altyn dombyra» ıegeri, aıtysker aqyn Muhtar Nııazov sóz sóıledi.
Jalaǵashtyqtarǵa ystyq yqylastaryn sondaı-aq beınerolık arqyly Almaty Zań akademııasynyń kafedra meńgerýshisi Atamurat Shámenov, medıtsına ǵylymdarynyń doktory, professor, A.Syzǵanov atyndaǵy Ulttyq ǵylymı hırýrgııalyq ortalyqtyń basqarma tóraǵasy, «Qazaqstannyń 100 jańa esimine» engen Bolatbek Baımahanov, Qazaqstan Jýrnalıster odaǵynyń múshesi, Jalaǵash aýdanynyń «Qurmetti azamaty» Sábıt Imanǵalıev, sazger, aıtysker aqyn, Qazaqstannyń eńbek sińirgen qyzmetkeri Elena Ábdihalyqova joldady.
Shara sońynda «Týǵan jerge taǵzym» aktsııasy aıasynda júzege asyrylatyn birqatar áleýmettik mańyzdy jobalardy qarjylandyrý maqsatyndaǵy memorandýmǵa qol qoıyldy.