Qyzylorda oblysy Syrdarııa aýdanyna jańa ákim taǵaıyndaldy

QYZYLORDA. QazAqparat - Qyzylorda oblysy Syrdarııa aýdanynyń jańa ákimi taǵaıyndaldy, dep habarlaıdy QazAqparat tilshisi.

Oblys ákiminiń ókimimen Qazaqstan Respýblıkasy Prezıdenti Ákimshiligi men Syrdarııa aýdandyq máslıhatynyń kelisimderi boıynsha Syrdarııa aýdanynyń ákimi qyzmetine rotatsııalyq tártippen Murat Nálhojauly Ergeshbaev taǵaıyndaldy.

Aımaq basshysy Gúlshara Ábdiqalyqova jańa aýdan ákimin Syrdarııa aýdanynda ótken jıynda tanystyrdy.

Murat Ergeshbaev 1966 jyly Qyzylorda qalasynda dúnıege kelgen.

Almaty halyq sharýashylyǵy ınstıtýtyn jáne QR Prezıdenti janyndaǵy Ulttyq joǵarǵy memlekettik basqarý mektebin bitirgen.

Eńbek jolyn 1989 jyly Syrdarııa aýdanynda Jambyl keńsharynyń ekonomısti retinde bastap, Syrdarııa aýdandyq ónerkásip birlestiginiń bólim bastyǵy qyzmetterin atqarǵan.

Sondaı-aq oblysta bank salasynda túrli basshylyq laýazymdar atqyryp, QR Tótenshe jaǵdaılar mınıstrliginiń «Órt sóndirýshi» aktsıonerlik qoǵamynyń vıtse-prezıdenti bolǵan.

2008-2017 jyldary Qyzylorda qalasynyń ákimi, oblystyq qarjy basqarmasynyń bastyǵy, Qarmaqshy jáne Shıeli aýdandarynyń ákimi, Almaty qalasy boıynsha tutynýshylardyń quqyqtaryn qorǵaý departamenti basshysynyń orynbasary, «QazAgroÓnim» aktsıonerlik qoǵamynyń basqarýshy dırektory, Qyzylorda oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy qyzmetterin atqarǵan.

2017 jylǵy qazan aıynan bastap Qazaly aýdanynyń ákimi qyzmetin atqaryp keldi.

Eske salsaq, budan buryn Aral jáne Qazaly aýdandaryna jańa ákim taǵaıyndalǵan bolatyn.