Qyzylorda oblysy Iranǵa kúrishti alty ese qymbat baǵaǵa satady - Kósherbaev
Sebebi gıdrotexnıkalyq nysandar jóndelip, sapaly tuqym shyǵarý jumysy jolǵa qoıyldy, dep xabarlaıdy QazAqparat tilshisi.
"Qazirgi kezde taǵy bir baǵytty damytýdy kózdeımiz. Iranǵa qatysty sanktsııalar alynyp tastalǵannan keıin, biz osy eldiń ekonomıkasyn zerdelep shyqtyq. Sebebi Beıneý arqyly temirjolmen Parsy shyǵanaǵyna shyǵýǵa múmkindik bar. Olar jyl saıyn 4 mln. tonna kúrishti satyp alady. Sóıtip, ol jaqtaǵy kúrishtiń tuqymyn alyp, egip kórdik. Ótken jyly jaqsy ónim jınadyq. Bıyl sony tolyǵymen egetin bolamyz. Osylaısha, Iran úshin egetin kúrishtiń baǵasy qazir óz naryǵymyzda jáne TMD-da satyp jatqan kúrishtiń baǵasynan alty ese qymbat bolady", - dedi Kósherbaev Astanadaǵy beıresmı kezdesý kezinde.
Aıta keteıik, "Qazmedıa" ortalyǵynda Qyzylorda oblysynyń ákimi Qyrymbek Kósherbaevpen beıresmı kezdesý ótip jatyr. Oǵan qoǵam qaıratkerleri, blogerler men jýrnalıster qatysýda.
Beıresmı kezdesýdi galstýksyz ótkizý uıǵaryldy. Alaıda, qoǵam qaıratkeri Murat Ábenov galstýk kıip keldi. Barlyq qatysýshylardyń galstýksyz kelgenin kórgen ol: "Shynymdy aıtsam, barlyǵy birdeı galstýksyz keledi dep oılaǵan joqpyn", - dep, báriniń kózinshe ózinikin sheship tastady.