Qyzylorda oblysy ákiminiń bilim granty 2 esege kóbeıdi
Aımaqta jastarǵa mundaı qamqorlyq 2013 jyldan beri jasalyp keledi. Bul qoldaý negizinen aýyldyq jerdegi kópbalaly jáne turmysy tómen otbasynan shyqqan daryndy túlekterge kórsetiledi. Alǵashqy ýaqytta oblys ákimini atynan 100 grant bólinetin edi. Bıyldan bastap oblys ákiminiń granty eki esege deıin ósip, 205-ke jetip otyr.
2014 jyldan bastap aımaqtyń mektep bitirýshi túlekterine Reseıdegi Máskeý men Sankt-Peterbýrgtiń úzdik tehnıkalyq joǵary oqý oryndaryna bilim alýǵa múmkindik týdy. Búgingi tańda alǵashqy 75 túlektiń 62-si dıplomyn alyp, elge oraldy. Qalǵan 13 túlek magıstratýrada oqýyn jalǵastyrady. Olardy jumyspen qamtý máselesi qarastyrylýda. Bul jumystar Elbasy Joldaýy men «100 naqty qadam-Ult jospary» aıasynda júzege asyrylýda.
Oblystyń birqatar kásiporyndary atalmysh túlekterdi jumysqa qabyldaýǵa daıyn. Olardyń qatarynda «QazAtomProm» ulttyq kompanııasy - 11, «Gejýba Shıeli Tsement» seriktestigi - 8 túlekti ózderine qyzmetke qabyldaýdy josparlap otyr. Al «SKZ-U» kúkirt qyshqyl zaýyty, Qyzylordanyń kishi tonajdy munaı óńdeý zaýyty, «Krıstall menedjment» jáne basqa da iri kásiporyndar jas mamandarǵa suranys jasap otyr. Birqatar túlekter memlekettik qyzmettiń kadrlyq rezervine alynady.
Ústimizdegi jyldan bastap Reseıdegi M.V.Lomonosov atyndaǵy Máskeý memlekettik ýnıversıteti «Kıberqaýipsizdik» jáne «Protsesterdi matematıkalyq modeldeý» mamandyqtary boıynsha oblys jastaryna magıstratýrada oqý úshin 20 grant bóledi.
Sonymen birge, Tatarstandaǵy Qazan qalasynyń «Innopolıs» ýnıversıtetinde qyzylordalyq balalardy oqytý týraly kelisim jasaldy. Máskeýdegi «Skolkovo» ınnovatsııalyq ortalyǵymen yntymaqtastyq ornatylýda. Buǵan qosymsha, ústimizdegi jyldyń shilde aıynda oblys ákimdigi Astanada EvraAzES-tiń parlamentaralyq Assambleıasy janyndaǵy ýnıversıtetpen yntymaqtastyq týraly memorandýmǵa qol qoıdy. Ýnıversıtet jyl saıyn oqýǵa túsý emtıhandaryn sátti tapsyrǵan Qyzylorda oblysynyń túlekterine 10 bilim grantyn bóletin bolady.
Atap óteıik, Ulttyq biryńǵaı testileý boıynsha aımaqtyń ortasha kórsetkishi 85,82 baldy kórsetti. Birneshe jyldan beri Qyzylorda oblysy UBT kórsetkishteri boıynsha aldyńǵy bes oblystyń qataryna kiredi.