Qyzylorda munaıy eksportyna kvotany ulǵaıtý usynyldy
«2017 jyldan beri Energetıka mınıstrligi Qyzylorda oblysyna munaı eksporty kvotasyn ulǵaıtý máselesi «Kenkııaq-Atyraý» reversi jobasy iske qosylǵannan keıin ǵana tehnıkalyq múmkin bolady degen ustanymda bolyp keldi», - dedi Rýslan Rýstemov Senat otyrysynda Úkimet basshysy Álıhan Smaıylovtyń atyna saýal joldaı otyryp.
Onyń aıtýynsha, atalǵan joba Qyzylorda oblysyndaǵy jer qoınaýyn paıdalanýshylardyń ishki naryqqa munaı jetkizý júktemesin 80%-dan 50%-ǵa deıin tómendetýge múmkindik berýi tıis edi.
«Alaıda, 2021 jyly atalǵan revers qoldanysqa berilgenimen, Energetıka mınıstrligi Qyzylorda oblysynda munaı kóleminiń sarqylýyna baılanysty kvotany ulǵaıtýdyń múmkindigi joq ekendigin aıtyp otyr. Atalǵan másele Úkimet tarapynan egjeı-tegjeıli qaralyp, qoldaý tapqan jaǵdaıda Qyzylorda oblysyndaǵy birqatar ózekti áleýmettik problemanyń sheshimi tabylatyny anyq», - deıdi halyq qalaýlysy.
Depýtat keltirgen derekterge sáıkes, Qyzylorda oblysynyń munaı óndirýshi kompanııalary ónimniń 80%-yn ishki naryqqa satady, 20%-y ǵana eksportqa ketedi.
Senatordyń pikirinshe, ishki naryqtaǵy munaı barreliniń quny álemdik baǵadan 2,5 ese tómen. Demek, munaıshylar aıtarlyqtaı somadan qaǵylyp otyr.