Qyzylorda men Jezqazǵandy jalǵaıtyn jol qaıta jóndelip jatyr

ASTANA. QazAqparat – 218 shaqyrymdy quraıtyn «Qyzylorda-Jezqazǵan» tasjolynda jóndeý júrip jatyr, dep habarlaıdy QazAqparat tilshisi.

«Bıyl «Qyzylorda-Jezqazǵan» (218 shaqyrym) avtojolyn qaıta jańartý jumysy bastaldy. Ulytaý oblysy aýmaǵyndaǵy ýchaskeler boıynsha merdiger kompanııany anyqtaý úshin konkýrs júrip jatyr. Sondaı-aq jekelegen ýchaskelerde jobalyq-smetalyq qujattardy ázirleý aıaqtalýǵa jaqyn», - dedi QR IIDM avtomobıl joldary komıtetiniń tóraǵasy Tólegen Abdýllın OKQ-de ótken brıfıngte.

Eske sala ketsek, byltyr Memleket basshysy «Jezqazǵan-Qyzylorda» avtomobıl jolynyń qurylysyna qatysty tapsyrma bergen edi.

«2024 jyly Jezqazǵan-Qyzylorda avtomobıl jolynyń qurylysy aıaqtalýy tıis. Bul Jezqazǵan men Sátbaev qalalarynyń saýda-kólik baılanysyn kúsheıtýge, sonymen qatar júk tranzıtin arttyrýǵa múmkindik beredi», - degen edi Qasym-Jomart Toqaev ótken jyly Ekibastuzda ótken monoqalalardy damytý máselelerine arnalǵan jınalysta.

Buǵan deıin avtomobıl joldary komıtetiniń basshysy jyl sońyna deıin respýblıkalyq joldardyń 91 paıyzy talapqa saı bolatynyna sendirdi.

Sondaı-aq jyl sońyna deıin elimizde aqyly joldardyń baǵasy ózgeredi.