Qyzylorda mektepterinde jaratylystaný pánderi aǵylshynsha oqytylmaq
«100 naqty qadam» Ult josparyna sáıkes jaratylystaný baǵytyndaǵy pánderdi joǵary synyptarda aǵylshyn tilinde oqytýǵa kezeń-kezeńmen kóshýdi kózdeıtin baǵdarlamany qolǵa aldyq. Oblys boıynsha joǵary synyptarda matematıka, fızıka, ınformatıka, hımııa, bıologııa pánderin aǵylshyn tilinde ıgerýdi barlyq mektepterde birdeı engizilmeıdi. Bul júıege arnaıy irikteýden ótken mektep-lıtseıler men mektep-gımnazııalary kiretin bolady, - dedi oblystyq bilim basqarmasynyń basshysy Baqytjan Saılybaev.
Óńirde 2015-2016 oqý jyly Nazarbaev Zııatkerlik mektepteri men «Bilim-ınnovatsııa» lıtseıleriniń tájirıbesinde bilim beretin 46 ınnovatsııalyq mektep-lıtseıler men mektep-gımnazııalar qalyptastyryldy.
2016-2017 oqý jylynda atalǵan mektepterdegi 320 lıtseı synyptaryndaǵy 7358 oqýshyǵa aǵylshyn tili páni aptasyna 5 saǵat kóleminde oqytylyp kelgen. Jańa oqý jylynda olar aǵylshyn tilinde pánderdiń termınologııasyn ıgerýge kóship, kelesi oqý jylynan bastap, 10-11 synyptarda oqý pániniń mazmunyn aǵylshyn tilin paıdalanyp otyryp, ıgeretin bolady.
«Osy maqsatta 210 pán muǵalimderi arnaıy til meńgerý kýrstarynan ótip, árbir synyptaǵy oqý pánderiniń aǵylshynsha termınologııasyn ıgerýge qajetti oqý quraldaryn daıarlaý qolǵa alyndy. Oqý jospary boıynsha lıtseı, gımnazııa synyptarynda aptasyna 4 saǵat kóleminde jaratylystaný, gýmanıtarlyq baǵyttaǵy pánderdi tereńdetip oqytý jáne ǵylym negizderi boıynsha 1500saǵat kóleminde ǵalymdardyń dáristerin tyńdaý júzege asyryldy», - dep atap ótti bilim basqarmasynyń basshysy.
Saılybaevtyń aıtýyna qaraǵanda, oblysta quramynda ınnovatsııalyq mektep-lıtseıler, mektep-lıtseı-ınternattar, mamandandyrylǵyn mektepter men bilimgerler akademııasy bar bilim berýdiń sapasyn basqarý júıesi qalyptastyrylýda.
«Árıne, bilim berý úderisin uıymdastyrý úshin eki tildi qatar meńgergen pedagogtyń qajettiligi belgili. Búgingi kúni maman bop qalyptasqan pán muǵalimderine arnaıy kýrstar arqyly aǵylshyn tili úıretilýde», - deıdi ol.
Oblystyq bilim bóliminiń basshysy bul baǵyttarda qordalanǵan máselelerdiń da bar ekendigin aıtty. Máselen, aǵylshyn tilin meńgerýde kolledjder men ýnıversıtetterde kásibı pedagogıkalyq bilimdi 2 tilde qatar meńgergen bilikti mamandardy daıarlaý máselesi búgingi kúni ózekti.
«Atalǵan máseleni sheshý úshin 2015 jyldan bastap respýblıkalyq ádistemelik ortalyq bolyp tabylatyn M. Mámetova atyndaǵy Qyzylorda gýmanıtarlyq kolledjinde «Bilim-ınnovatsııa» halyqaralyq qorynyń qoldaýymen aǵylshyn tilin meńgergen negizgi mekteptiń matematıka, fızıka, ınformatıka pánderiniń muǵalimderin daıarlaý qolǵa alyndy. Qajetti oqý-ádistemelik quraldary men 2 tildi meńgergen mamandarmen qamtamasyz etildi. Búgingi kúni kolledjdiń 3 kýrsynda 225 stýdent osy baǵdarlama boıynsha bilim alýda. 2018-2019 oqý jyly «Aǵylshyn tilin meńgergen pán muǵalimi» biliktiligin alǵan alǵashqy 75 maman ınnovatsııalyq mektepterde jumys jasaıtyn bolady», - dep atap ótti Saılybaev.