Qyzylorda kitaphanalarynda 4,5 mıllıonnan astam kitap qory bar
Syr óńiri ejelden mádenıet pen ónerdiń ordasy. Qoınaýy syrǵa toly Qyzylorda oblysynda mádenıet salasyndaǵy memlekettik baǵdarlamalar boıynsha jumystar qarqyndy júrgizilýde.
Qyzylorda oblystyq kitaphanasynda bıyl dybys jazý stýdııasy ashylyp, joǵary qabatqa kóteriletin arnaıy baspaldaq alyndy.
Sonymen qatar, 2016 jylǵa deıin Aral, Qazaly, Shıeli aýdandarynda osy kitaphanalardyń arnaıy pýnktteri qyzmet kórsetse, búgingi kúni barlyq aýdandar poshta qyzmeti arqyly túgel qamtylyp otyr. Nátıjesinde, oblys boıynsha 237 zaǵıp janǵa 1 399 arnaýly ádebıet usynyldy.
«Qazirgi tańda oblys kitaphanalarynyń kitap qory - 4 mln 507 myń dana. Oqyrmandar suranystaryn qanaǵattandyrý maqsatynda kitaphanalardyń kitap qory bıylǵy jyly 3 myń 900 dana, memlekettik tapsyryspen 14 myńǵa jýyq jańa ádebıettermen tolyqty», - deıdi oblystyq mádenıet, muraǵattar jáne qujattama basqarmasynyń basshysy Erjan Abdrahmanov.
Elbasynyń bıylǵy Joldaýynan týyndaıtyn basym baǵyttardyń biri «Tsıfrlyq Qazaqstan» baǵdarlamasy aıasynda «Elektrondy arhıv», «Elektrondy kitaphana» aqparattyq júıelerin qalyptastyrý, jetildirý, azamattardyń tıisti aqparattarǵa qoljetimdiligin qamtamasyz etý maqsatynda da birqatar jumystar atqarylýda.
Qazirgi tańda oblys boıynsha ólketaný baǵytyndaǵy 3 796 kitap (752 150 bet), 6 gazet toptamasy tsıfrly formatqa kóshirilse («Lenın joly», «Pýt Lenına» oblystyq gazetteri), arhıv qujattarynyń 73 myń 154 saqtaý birliginiń 10 mln 542 myń paraǵy sandyq formatqa kóshirilip, saqtandyrý qorlary jasaldy.
Oblys mýzeıleriniń qorynda barlyǵy 127 myń 807 eksponat bar. 2017 jyldyń І jartyjyldyǵynda 1 665 eksponat jınaqtalyp, onyń ishinde oblystyq mýzeı qory 436 jańa jádigermen tolyqty. Sondaı-aq, Syr ónerpazdary mamyr aıynda Tashkent, Orynbor qalalarynda gastroldik kontsertter ótkizdi.
Barshańyzǵa belgili ústimizdegi jyldyń 10-14 tamyz kúnderi «EKSPO-2017» halyqaralyq mamandandyrylǵan kórmesi aıasynda Astana qalasynda Qyzylorda oblysynyń mádenıet kúnderi ótti. «Etnoaýyl» ulttyq mádenı keshenindegi «Syr jeshiresi» atty kórmede óńirimizdiń qolóner sheberleri 10 kún boıy satý-kórmelerin ótkizdi.
Elbasy maqalasynan týyndaıtyn «Qazaqstannyń kıeli jerleriniń geografııasy» jobasy aıasyndaǵy «Qazaqstannyń jalpyulttyq qasıetti oryndary» respýblıkalyq tizimine oblys boıynsha 63 tabıǵı, tarıhı-mádenı eskertkishter usynyldy.
Búgingi kúni «Qasıetti Qazaqstan» ólketanýdy damytý ortalyǵy tańdap alǵan respýblıka boıynsha 100 makrosakraldy obektige bizdiń oblystan 10 eskertkish engizildi (Jankent, Syǵanaq, Shirik rabat, Jent qalashyqtary, Qorqyt ata memorıaldy kesheni, Hrıstos-Spasıtel shirkeýi, Oqshy ata, Qorasan ata jáne Qylyshty ata keseneleri, Begim ana munarasy).
Sonymen qatar Syǵanaq, Jankent, Shirik-Rabat qalashyqtaryna arheologııalyq qazba jumystary kezeń-kezeńimen júrgizilse, bıylǵy jyly jańadan Sortóbe, Jent qalashyqtary men Kerderi kesenesine qazba jumystary júrgizilýde.