Qyzylorda qalasynda Óner saraıy men Neke saraıy boı kóteredi

QYZYLORDA. QazAqparat - Qyzylorda oblysynda jyl saıyn ekonomıkalyq jáne demografııalyq ósim qarqyny údep, eńbekke belsendi halyq sany artyp keledi. Bul óz kezeginde qoǵamdyq, áleýmettik jáne mádenı-kópshilik sharalarda belsendilik tanytatyn ortanyń da ulǵaıýyna yqpal etedi.

Búginde oblys ortalyǵynda syıymdylyǵy jaǵynan eń úlken 600 oryndyq N. Bekejanov atyndaǵy qazaq-mýzykalyq akademııalyq drama teatry aımaq halqyna qyzmet etip keledi.

Degenmen halyq sany ósiminiń oń dınamıkasyna baılanysty óńirdegi mádenıet úıleri men óner ordalarynda kórermenderge arnalǵan oryn tapshylyǵynyń týyndaǵanyna birshama ýaqyt boldy.

Osy jaǵdaıdy eskere kele aımaq basshysy N.Nálibaev oblys ortalyǵynan zamanaýı úlgidegi birneshe áleýmettik ǵımarat salý týraly bastama kótergen bolatyn. Sonyń biri – Óner saraıy.

Aımaq basshysynyń tapsyrmasy negizinde Sultan Beıbarys kóshesiniń boıynan salynatyn ǵımaratqa 2 gektar jer kólemi belgilengen.

Halyq ıgiligine paıdalanýǵa beriletin nysan 1000 oryndyq kópfýnktsıonaldy keshen retinde ashylady.

ıAǵnı, onda mádenıet salasynyń sımfonııalyq, estradalyq jáne ulttyq óner baǵytyndaǵy kontserttik baǵdarlamalar men túrli formattaǵy qoǵamdyq is-sharalar da ótkiziledi.

Sondaı-aq, qalamyzda neke qııýdy josparlaǵan jandar eski ǵımaratta ornalasqan azamattyq hal aktilerin tirkeý mekemesine júginetin.

Jas jubaılar úshin eń mańyzdy jáne tarıhı saltanatty rásim uıymdastyratyn kabınetimen jabdyqtalmaǵan ǵımaratqa qatysty turǵyndar men jańa ómirge birge qadam basýǵa kelgen jastar tarapynan da usynystar jıi aıtylyp keldi.

Osyny eskergen aımaq basshysy Neke saraıy saltanatty ǵımaratyn salý týraly tapsyrma berdi.

Atalmysh áleýmettik nysannyń boı kóterýi aımaqtyń qurylys-ındýstrııalyq sáýletin arttyrýmen qatar otbasy-demografııalyq saıasatty júzege asyrýǵa úles qosýǵa talaptanǵan jastardyń ómirindegi eń mańyzdy sátterin áserli etýge zor múmkindik syılaıdy.

Aıta keteıik, zamanaýı úlgide salynatan ǵımarattyń jalpy aýdany - 2100 sharshy metr.

Búginde qurylys jumystaryn júrgizýshi merdigerdi anyqtaýǵa memlekettik satyp alý konkýrsy jarııalanǵan.

Áleýmettik nysan paıdalanýǵa berilgen soń munda oblys turǵyndaryna AHAT qyzmetimen qatar otbasy qundylyqtaryn dáripteıtin áleýmettik-mádenı is-sharalar da júrgiziledi dep kútilýde.

Aıta ketý kerek, bul nysandardyń jobalyq-smetalyq qujattamasy demeýshiler esebinen ázirlengen.