Qyzylorda qalasynda kóp qabatty 12 turǵyn úıdiń qurylysy bastaldy (FOTO)
Jańa baspanalar Shuǵyla yqshamaýdany Shúkirov kóshesi boıynan jáne «SPMK-70» turǵyn aýdanynda boı kóteredi. Shúkirov kóshesi boıyndaǵy bes qabatty 4 turǵyn úıdiń qurylysyn osy jyly aıaqtaý josparlanýda. Jalpy aýdany 13 500 sharshy metrdi quraıtyn turǵyn úıde 230 otbasy qonys toıyn toılaıtyn bolady. Sondaı-aq, SPMK-70 turǵyn aýdanynda bir 40 páterli, úsh 50 páterli jáne úsh 60 páterli turǵyn úı qurylysy bastaldy. Turǵyn úılerdi 2015 jyldyń jeltoqsan aıynda paıdalanýǵa berý josparlanyp otyr.
Budan soń oblys ákimi Qyrymbek Kósherbaev pen «Báıterek» UBH» AQ-nyń basqarma tóraǵasy Qýandyq Bıshimbaev «Araı» yqshamaýdanynda salynyp jatqan bes qabatty turǵyn úıdiń qurylysymen tanysty. Qazir qurylys alańynda 300-ge jýyq jumysshy eńbek etýde. 280 páterli turǵyn úı qyrkúıek aıynda paıdalanýǵa berilmek. Sondaı-aq, Jeltoqsan kóshesinde salynyp jatqan jalpy aýdany 4000 sharshy metrdi quraıtyn 70 páterli turǵyn úıdiń qurylysymen de tanysty.
Aıta keteıik, ótken jyly Qyzylorda oblysynda «Qoljetimdi baspana » jáne «Jumyspen qamtýdyń Jol kartasy» baǵdarlamalary aıasynda 38 myń sharshy metrdi quraıtyn 466 páterdi paıdalanýǵa berilgen bolatyn. Al bıyl jyl sońyna deıin oblysta respýblıkalyq, jergilikti bıýdjetterden bólingen qarajattarǵa jáne «Qazaqstannyń Ipotekalyq Kompanııasy» Ipotekalyq Uıymy» AQ jáne «Samuryq-Qazyna» jyljymaıtyn múlik qory esebinen 180 myńnan astam sharshy metrdi quraıtyn 2700-den astam páter paıdalanýǵa beriledi dep josparlanýda. Bul kórsetkish ótken jyldarmen salystyrǵanda 4 esege artyq.