Qyzylqoǵa aýdanynda áli de eki aýyldyń kóshelerin sý basyp jatyr

ATYRAÝ. QazAqparat – Atyraý oblysyndaǵy Qyzylqoǵa aýdanynyń eki aýylynan 18 myń tekshe metr qar sýy sorylǵan, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, Qyzylqoǵa aýdanynda erigen qar sýyn sorý jumysy jalǵasyp jatyr.

Aýa raıynyń kúrt jylynýyna baılanysty Qyzylqoǵa aýdanyndaǵy aýyldardyń turǵyndarynan 6 naýryzdan beri kún saıyn shaqyrtý jıi túsetin boldy.

Soǵan baılanysty departamenttiń jedel qutqarý jasaǵynyń qutqarýshylary jergilikti atqarýshy organnyń qyzmetkerlerimen birlesip erigen qar sýyn sorý avarııalyq-qutqarý jumystaryn júrgizip jatyr.

Maqsat – turǵyn úıler men aýlalardy qar men jańbyr sýy basýynyń aldyn alý.

«Búgin, 10 naýryzda jergilikti ýaqytpen saǵat 17:00-ge deıin Mııaly jáne Jangeldın aýyldarynan kóshelerde jınalǵan 18 myń tekshe metr bolatyn erigen qar sýy arnaıy kóliktermen soryldy», -dep habarlady departamenttiń qoǵammen baılanys toby.

Avarııalyq-qutqarý jumystaryna Atyraý oblystyq tótenshe jaǵdaılar departamentinen 15 qyzmetker, 3 tehnıka men 1 motopompa, al, jergilikti atqarýshy organnyń 40 qyzmetkeri men 9 tehnıkasy, 5 motopompa tartylǵan.

Eske sala ketelik, budan buryn Atyraý oblysynda tórt aýyldan 17 myń tekshe metrge jýyq qyzyl sý sorylǵanyn habarlaǵan edik.

Inder aýdanyndaǵy Jarsýat, Eltaı, Órlik aýyldarynyń kóshelerinen 6, 7, 8 naýryzda 6 710 tekshe metr sý sorylǵan. Al, Qyzylqoǵa aýdanynyń ortalyǵy – Mııaly aýylyndaǵy eki úıdiń aýlasynan úsh táýlikte erigen qardyń 10 myń tekshe metr sýy sorylyp alynǵan.