Qyzylaǵash sý qoımasynyń mańynan 60 usaq maldyń óleksesi tabyldy

TALDYQORǴAN. QazAqparat - Jetisý oblysyndaǵy Aqsý aýdanynyń ákimdigi sý qoımasy jaǵasynan tabylǵan mal ólekselerine túsinikteme berdi, dep habarlaıdy QazAqparat tilshisi.

Qyzylaǵash aýyldyq okrýgi «platına» aýmaǵynda boljam boıynsha sýǵa qulap, tunshyqqan 8 bas eshki, 9 bas qozy, 43 bas qoı shyǵyn boldy.

Jaǵdaı shamamen juma-senbi kúnderi bolǵan.

«Mal ólekseleri sýdan shyǵarylyp, Qyzylaǵash aýylyndaǵy mal qorymyna aparyp tastaldy. Qazirgi mezette qulaq japsyrmalaryna AShJB derekqorynan qaraý arqyly taldaý jasalynyp, mal ıesin anyqtalyp jatyr. Mal ıesi anyqtalǵan jaǵdaıda Ákimshilik quqyq buzý týraly kodeksi boıynsha ákimshilik shara qoldanylady. Boljam boıynsha mal jazǵy jaıylymǵa kóshirilip bara jatqan» delingen Aqsý aýdany ákiminiń baspasóz qyzmeti taratqan habarlamada.

Aıta keteıik, mal ólekseleriniń vıdeosy jelige jarııalanǵan bolatyn.