«Qyzyl jebe» romany túrik tilinde jaryq kórdi
Bul týraly Eýrazııa jazýshylar qaýymdastyǵynyń tóraǵasy, túrkııalyq jazýshy ıAkýp Omeroǵly málimdedi.
«Qyzyl jebe» romanynyń birinshi bólimi «Rysqul» kitabynyń jarııalanýyn uzaq ýaqyttan beri kúttik. Qazaq ádebıetiniń eń úzdik avtorlaryn kórsetý úshin Sherhan Murtaza eńbekteriniń jarııalanýy óte mańyzdy. Sherhan Murtazanyń shyǵarmalarynsyz jańa qazaq ádebıetin elestetý qıyn. Byltyr uıymymyzdyń baspa organy sanalatyn «Kardesh Kalemler» jýrnalynda jazýshynyń «Aı men Aısha» romanyn jarııalaǵan edik. Bıyl «Qyzyl jebeni» úlken ǵanıbetpen jarııalaımyz. 5 qazandy arnaıy tańdaý arqyly Sherhan aǵanyń ólmegenin, óz týyndylarymen máńgi jasaıtynyn kórsetkimiz keldi», - dep jazdy ıAkýp Omeroǵly.
Shyǵarmany tájirıbeli aýdarmashy, qazaq tili men ádebıeti boıynsha sarapshy, 70-ten astam týyndy aýdarǵan Ýfýk Týzman túrik tiline aýdarǵan.
«Qyzyl jebe» - túrik ádebıetine engen ádebı klassıka arasynda qundy tarıhı romandardyń biri. «Qyzyl jebeniń» oqyrmandary qazaq mádenıetinen jáne tarıhı oqıǵalardan habardar bolady», - dedi Ýfýk Týzman.
Eske sala ketsek, Almatyda jazýshy Sherhan Murtaza turǵan úıge memorıaldy taqta ornatyldy.
Jazýshy ótken jyldyń qazan aıynda 86 jasynda dúnıeden ozdy.
Sherhan Murtaza 1932 jyly Jambyl oblysynyń Jýaly aýdanynda dúnıege kelgen. Ol 1955 jyly M.V.Lomonosov atyndaǵy Máskeý memlekettik ýnıversıtetiniń jýrnalıstıka fakýltetin bitirgen. Jastyq shaǵynda «Lenınshil jas» pen «Sotsıalıstik Qazaqstan» gazetiniń tilshisi bolyp qyzmet etken. 1963-1970 jyldar aralyǵynda «Lenınshil jas» gazetiniń redaktory qyzmetinde bolǵan. Odan keıingi kezderi «Jazýshy» baspasy men «Jalyn» almanahynyń, «Juldyz» jýrnalynyń Bas redaktory, Qazaqstan Jazýshylar odaǵy basqarmasynyń ekinshi hatshysy, «Qazaq ádebıeti» gazetiniń bas redaktory ári Qazaqstan Jazýshylar Odaǵy basqarmasynyń hatshysy qyzmetterin atqarǵan.
1989-1992 jyldary «Egemen Qazaqstan» gazetiniń bas redaktory, 1992-1994 jyldary - Qazaqstan Respýblıkasy memlekettik teleradıo kompanııasynyń tóraǵasy qyzmetterin atqardy. QR Parlamentiniń Májilis depýtaty boldy.
Jazýshynyń ár jyldary jazylǵan «Tabylǵan teńiz», «Belgisiz soldattyń balasy», «Ahmetjannyń anty», «Myltyqsyz maıdan» povesteri, «41-jylǵy kelinshek», «Internat nany» áńgimeleri, «Qara marjan», «Júrekke ájim túspeıdi», «Ne jetpeıdi?», bes kitaptan turatyn «Qyzyl jebe», «Aı men Aısha» romandary qazaq prozasyna qosqan ólsheýsiz úlesi bolyp qalary sózsiz.