«Qyzyl» mártebesi bar aıyppul salynǵan aqmolalyqtardyń tizimi jarııalandy
Olarǵa Ákimshilik quqyqbuzýshylyq kodeksiniń 425 baby 1-shi bóligi boıynsha hattamalar toltyryldy, dep habarlaıdy QazAqparat tilshisi oblystyq sanıtarlyq-epıdemıologııalyq baqylaý departamentine silteme jasap.
Vedomstvonyń málimetinshe, COVID-19 oń PTR testi bar adamdar qoǵamdyq oryndarǵa baryp, ASHYQ jobasymen jumys isteıtin nysandardaǵy qyzmetterdi paıdalanýǵa tyrysqan.
«Aqmola oblysynda úıde oqshaýlaý rejımin buzǵany úshin oblystyń «qyzyl» mártebesi bar taǵy 36 turǵyny ákimshilik jaýapqa tartyldy. Olarǵa Ákimshilik quqyqbuzýshylyq kodeksiniń 425 baby 1-shi bóligi boıynsha hattamalar toltyryldy. Atalǵan bap boıynsha 30 aılyq eseptik kórsetkish mólsherinde, ıaǵnı 87 510 teńge aıyppul qarastyrylǵan. Jalpy, úı karantınin buzǵany úshin jeke tulǵalarǵa 91 ákimshilik jaza (aıyppul) qoldanyldy», - dedi vedomstvodan.
Osy rette, Aqmola oblysynyń sanıtarlyq-epıdemıologııalyq baqylaý departamenti úı karantınindegi adamdardy oqshaýlaý sharttaryn qatań saqtaýǵa shaqyrady.
14 kúndik úı karantınin buzǵan turǵyndardyń tizimi Departamenttiń saıtynda jarııalanǵan.