Qyzyl Krest uıymy Astanada qazirgi kezdegi áleýetti gýmanıtarlyq máselelerdi talqylady

ASTANA. Sáýirdiń 2-si. QazAqparat /Jasulan Amanbaıuly/ - Búgin Astanada ótken dóńgelek ústelde Halyqaralyq Qyzyl Krest uıymynyń Ortalyq Azııadaǵy aımaqtyq ókildigi qazirgi kezdegi áleýetti gýmanıtarlyq máselelerge baılanysty taqyrypty kóterdi,

dep habarlaıdy QazAqparat.

Jıynǵa Halyqaralyq Qyzyl Krest uıymynyń Ortalyq Azııadaǵy aımaqtyq ókildiginiń basshysy Iv Djovannonı jáne ókildiktiń bólim basshylary, ÚEU ókilderi qatysty.

Iv Djovannonı qarýlanǵan kúsh kórsetý jaǵdaıynda qalǵan halyqtar men memleketterde gýmanıtarlyq kómek kórsetýdiń qazirgi jaı-kúıine jáne Qyzyl Krest uıymynyń olardy qoldaýǵa arnalǵan búgingi jobalaryna toqtaldy. «Álemde ártúrli shıelenisti jaǵdaılar bar bolǵandyqtan, Álem halyqtary aldynda gýmanıtarlyq shaqyrýlar tur», deıdi ol.

Dóńgelek ústel otyrysy barysynda adamzat aldynda turǵan gýmanıtarlyq mindetter men halyqaralyq ahýal, ulttyq zańnamaǵa gýmanıtarlyq normalardy engizý men olardy qoldaný jónindegi taqyryptar qamtyldy. Sonymen qatar zań jáne tártipti saqtaý men gýmanıtarlyq normalardy qoldaný aıasynda ózara pikir almasyldy.