«Qyzyl» aımaqtaǵy jylý elektr ortalyqtaryn jóndeýge 182 mlrd teńge kerek

ASTANA. QazAqparat – Eldegi 12 jylý elektr ortalyǵyn jóndeý bıýdjet esebinen qarjylandyrylady. Bul jaıynda Energetıka mınıstri Bolat Aqsholaqov Úkimet otyrysynda aıtty, dep habarlaıdy QazAqparat tilshisi.

«Qyzyl» aımaqtaǵy jylý elektr ortalyqtary úshin kelesi kúzgi-qysqy kezeńde táýekelderdi azaıtý maqsatynda negizgi jabdyqqa kúrdeli jóndeý, rekonstrýktsııalaý, jańǵyrtýdy júrgizý kólemi aıqyndaldy. Aldyn ala derek boıynsha, joǵaryda atalǵan jumystardy oryndaý úshin 182 mlrd teńge kóleminde qarjy qajet. Bul esep benchmarkıng sheńberinde júrgizildi», - dedi ol.

Mınıstr elektr jáne jylý energııasyna bekitilgen tarıfterdi eskergenniń ózinde energııa óndirýshi uıymdardy jóndeý úshin 93 mlrd teńge kerek ekenin málim etti.

«Qazirgi ýaqytta elektr stantsııalarynyń bekitilgen tarıfter sheńberinde elektr jáne jylý energııasyn ótkizýden túsetin kiris tolyqqandy jóndeý shyǵynyn ótemeıdi. Jetkiliksiz qarjy somasy - 88 mlrd teńge. Kommýnaldyq jáne kvazımemlekettik menshiktegi 12 jylý elektr ortalyǵy boıynsha joǵaryda atalǵan jumysty iske asyrýǵa memlekettik bıýdjetten, al 22 jeke jylý elektr ortalyǵy boıynsha – menshik ıesiniń óz qarajaty esebinen qarjylandyrý usynylady», - dedi Bolat Aqsholaqov.