«Qyzyl» aımaqqa kórshiles oblystar karantındi kúsheıtýi qajet - Eraly Toǵjanov

NUR-SULTAN. QazAqparat - Qyzyl aımaqqa kórshiles ornalasqan oblystar karantındik shekteýlerdi kúsheıtý is-sharalaryn aldyn ala pysyqtaýy qajet. Bul týraly búgin Úkimet otyrysynda QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Óńirlerdegi epıdemıologııalyq ahýal baqylaýda. Degenmen birneshe baǵyt boıynsha naqty is-sharalar qabyldanýy qajet. Oblystardyń, Nur-Sultan, Almaty, Shymkent qalalarynyń ákimderi óńirlik shtab jumystaryn kúsheıtýi qajet. Qyzyl aımaqtaǵy óńirlerdegi epıdemıologııalyq jaǵdaı shtab otyrysynda kúnsaıyn qaralýy tıis», - dedi Eraly Toǵjanov.

Onyń atap ótýinshe, sary aımaqqa engen óńirler jáne qyzyl aımaqqa kórshiles ornalasqan oblystar karantındik shekteýlerdi kúsheıtý boıynsha is-sharalardy aldyn ala pysyqtaýy qajet.

«Shekteý sharalary jaǵdaıynda bıznestiń qalypty jumysyn qamtamasyz etý maqsatynda barlyq óńirler Ashyq jobasyn kásipkerlik sýbektilerine engizý boıynsha naqty sheshimder qabyldaýy kerek», - dedi Premer-Mınıstrdiń orynbasary.