Qyzyl alańda Jeńis parady bastaldy

MÁSKEÝ. 9 mamyr. QazAqparat - Bul mınýttarda Máskeýdegi Qyzyl alańda Uly Otan soǵysyndaǵy Jeńistiń 67 jyldyǵyna oraılastyrylǵan áskerı parad ótýde.

Paradtyń saltanatty rásimi máskeýlik ýaqyt boıynsha saǵat 10:00-de bastaldy. Áskerý sherýge shamamen 14 myń adam jáne 100 birlikten astam áskerı tehnıka qatysýda. Saltanatty rásim «Qasıetti soǵys» ánimen Memlekettik Tý jáne Jeńis týyn alyp shyǵýmen bastaldy.

Jeńis paradyn RF Qorǵanys mınıstriniń mindetin atqarýshy Anatolıı Serdıýkov qabyldaýda, áskerı sherýdi RF Qarýly kúshteri Bas shtaby bastyǵynyń orynbasary, general-polkovnık Valerıı Gerasımov basqarýda.

Paradqa Uly Otan soǵysynyń 1,5 myń ardageri shaqyrylǵan. Sondaı-aq sharaǵa Joǵarǵy Bas Qolbasshy, RF Prezıdenti Vladımır Pýtın men RF Úkimetiniń basshysy Dmıtrıı Medvedev qatysýda.

Bıylǵy paradtyń ótken jylǵydan basty aıyrmashylyǵy mehanıkalandyrylǵan tizbek quramyndaǵy áskerı qyzmetkerlerden basqa onyń barlyq qatysýshylarynyń kıimniń paradtyq úlgisin kıgeninde.

Sondaı-aq Jeńis kúniniń parady 24 reseılik qalada ótýde. Reseı astanasynda merekelik sharalar aıaqtalǵan soń saǵat 22:00-de 30 dúrkin merekelik salıýt beriledi.