Qyzmettik kóligin jeke sharýasyna paıdalanǵan jambyldyqtar jaýapqa tartylady

TARAZ. QazAqparat- Tarazda memlekettik qyzmetshiler qyzmettik  kólikterin qandaı maqsatqa paıdalanatynyn tekserý boıynsha aktsııa ótti, dep habarlaıdy «QazAqparat» HAA tilshisi.

Jambyl oblystyq Memlekettik qyzmet isteri jáne sybaılas jemqorlyqqa qarsy is-qımyl departamenti habarlaǵandaı, «Qyzmettik kólik - qyzmettik maqsatta» atty aktsııa qyzmettik kólikti jeke maqsatta paıdalanýǵa tyıym salýǵa baǵyttalǵan.

«Zań boıynsha qyzmettik kólik tek jumys ýaqytynda ǵana paıdalanylýy kerek. Nemese qyzmettik issaparǵa shyǵý qarastyrylǵanda, onyń ózinde qajetti qujattarmen rastalǵan kezde ǵana. Eger qyzmettik kólik jumystan tys ýaqytta jeke maqsatqa paıdalanylsa, bul isti tártiptik komıssııa qarap, zań buzýshyǵa aıyppul salynady», - dedi departament basshysynyń orynbasary Dáýren Qaıpov.

Vedomstvo ókilderi aımaq turǵyndarynan, qyzmettik kólikti jeke maqsatta paıdalanyp júrgen adamdardy kórgen jaǵdaıda, kórsetilgen telefon nómirine qońyraý shalýdy surady.

Jambyl oblystyq Memlekettik qyzmet isteri jáne sybaılas jemqorlyqqa qarsy is-qımyl departamenti «Qyzmettik kólik - qyzmettik maqsatta» aktsııasy óńirdiń barlyq aýdandarynda jalǵasatynyn aıtty.