Qyzmetkerleri paramen ustalǵan 6 ákim jumysynan ketti

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń 1-shi departamentiniń asa mańyzdy ister jónindegi tergeýshisi Danııar Bekaıdarov baǵynyshty qyzmetkerdiń jemqorlyǵy úshin basshylaryn ostavkaǵa jiberý ınstıtýty qalaı jumys istep jatqany týraly aıtyp berdi, dep habarlaıdy QazAqparat tilshisi.

«Tikeleı baǵynyshtylardyń jemqorlyǵy úshin basshylardyń jaýapkershiligi ınstıtýty normatıvtik turǵyda retteldi. Ol bıylǵy jyldyń 9 aıynda ózinde tıimdi qural ekenin dáleldedi. Saıası basshylardyń otstavkaǵa ketýine qatysty qarastyrylyp otyrǵan kezeńde aýdandyq jáne oblystyq deńgeıdegi 9 ákim otstavkaǵa ketý týraly ótinish berdi, 6 ákim jumystan shyǵaryldy», - dedi ol onlaın brıfıng barysynda.

Máselen Sátbaev qalasynyń ákimi Ydyrysovtyń jáne Almaty oblysy Panfılov aýdany ákimi Ómirálıevtiń otstavkalary qabyldanbaǵan. Oblys ákimderi olarǵa «sógis» jarııalapty. Qaramaǵyndaǵy qyzmetkerleri jemqorlyq qylmysty ózgeristi engizýge deıin (2019 jylǵy 10 jeltoqsan) jasaǵandyqtan, Sátbaev qalasynyń ákimi otstavkaǵa ótinish bermeýine de bolar edi.

«28 qyrkúıekte Qostanaı oblysy Rýdnyı qalasynyń ákimi Ǵaıazov otstavkaǵa ketti. Ol bul qyzmetti 2011 jyldan beri atqaryp keledi. Buǵan deıin habarlanǵandaı (13 qyrkúıek) oǵan tikeleı baǵynyshty Rýdnyı qalasy Qashar kentiniń ákimi Aldonǵarovqa qatysty úkim zańdy kúshine engen bolatyn. Sol sekildi Atyraý oblysy Qurmanǵazy aýdanynyń ákimi Nurtaevtyń otstavkaǵa ketý týraly ótinishi qaralýda. Onyń orynbasary Tájibaev sottaldy. 8 qyrkúıekte onyń orynbasary Tájibaevqa qatysty úkim zańdy kúshine endi. 5 is áli monıtorıngte», - dedi Danııar Bekaıdarov.